Sport 9 rekordet më pikante në futboll: Disa mund të thyen, disa do...

9 rekordet më pikante në futboll: Disa mund të thyen, disa do të mbesin të paprekshëm

Ndeshjet ndërkombëtare, të luajtura këto ditë, kanë shërbyer, ndër të tjera, që Cristiano Ronaldo të arrijë shifrën e 700 golave në karrierë dhe Sergio Ramos të luajë ndeshjen e tij të 168-të me Spanjën, duke mposhtur Iker Casillas, si lojtarin spanjoll me më shumë paraqitje te “La Roja”. Shifra spektakolare, që megjithatë nuk janë rekorde absolute. Këtu janë nëntë prej tyre. Disa do të thyhen si rekorde, të tjerët do të mbesin të paprekshëm për një kohë të gjatë.

Më shumë ndeshje me kombëtaren: AHMED HASSAN

Sergio Ramos, me 168 ndeshje të luajtura deri tani për Spanjën, është në “top 10”, por ka ende një grusht lojtarësh përpara. Objektivi tjetër i tij do të jetë arritja e Buffon, i cili kryeson futbollistët europianë me 176 ndeshje për Italinë. Egjiptiani Ahmed Hassan është lojtari me më shumë ndeshje për kombëtaren, 184 të tilla, të luajtura me Egjiptin. Ramos mund ta arrijë atë, edhe Cristiano Ronaldo, që ka për momentin 162 ndeshje me Portugalinë. Natyrisht, nuk do ta kenë të thjeshtë nga mosha, por Spanja dhe Portugalia janë dy skuadra, që kualifikohen gjithmonë fazat finale të Kampionateve Europiane dhe Botërore. Ky fakt mund t’i ndihmojnë ata ta thyejnë rekordin e egjiptianit.

Më shumë ndeshje në terma globalë: PETER SHILTON

Lojtari me më shumë ndeshje zyrtare është Peter Shilton, i cili luajti jo më pak se 1390 të tilla në mesin e të gjitha klubeve të tij dhe ekipit kombëtar anglez. Një tjetër portier, Rogerio Ceni, dhe mesfushori Xavi Hernández, e kompletojnë podiumin, përkatësisht me 1241 dhe 1140 ndeshje. Një rekord i Shilton, shumë i komplikuar për t’u arritur.

Më shumë gola në një Botëror të vetëm: JUST FONTAINE

Një nga ato rekorde, që duket i paarritshëm. Francezi shënoi jo më pak se 13 gola në Kupën e Botës 1958, të luajtur në vendin e tij. Për të krijuar një ide mbi rekordin e Fontaine, vetëm shikoni Kupën e Botës që zhvilloi Ronaldo më 2002, kur shënoi 8 gola dhe mbeti 5 të tjerë pas francezit. Në terma absolutë, Miroslav Klose është golashënuesi më i mirë në historinë e Kupave të Botës, me 16 gola të realizuar në katër turne të tillë. Kjo “markë” gjermane, pa qenë e thjeshtë për t’u kapërcyer, është më e përballueshme se ajo e Fontaine. Duket se as Messi dhe as Cristiano Ronaldo nuk do të jenë në gjendje ta arrijnë rekordin e Klose. Argjentinasi ka gjashtë gola në Kupat e Botës, ndërsa Portugezi ka shënuar shtatë të tillë. Botërori i Katarit mund të jetë mundësia e fundit e të dyve.

Më shumë gola në të gjithë historinë: JOSEF BISCAN

Cristiano Ronaldo shënoi kundër Ukrainës golin e tij të 701-të. Ai arriti Gerd Müller, ndërsa përpara ka vetëm katër golashënues: Puskas (709 gola), Romario (748), Pelé (779) dhe Biscan (805 gola). Nuk duhet harruar që pas tij vjen Leo Messi me 668 gola dhe me një ritëm jashtëzakonisht të lartë shënimi. Nuk është e thjeshtë, por të dy, portugezi dhe argjentinasi aspirojnë të arrijnë rekordin e austriakut Biscan. Një tjetër sfidë midis dy dominuesve të futbollit botëror në dekadën e fundit.

Më shumë gola me kombëtaren: ALI DAEI (109 gola)

Një tjetër rekord, që Cristiano Ronaldo e ka në fokus. Portugezi është i dyti në listë, me 95 gola, 14 gola mbas iranianit Ali Daei. Messi, me 68 gola, duket shumë larg nga kjo shifër rekord. Neymar, me 60 gola për Brazilin dhe 27 vite mbi supe, mund ta kërcënojë iranianin në planin afatgjatë.

Më shumë gola në Champions: CRISTIANO RONALDO

Ka rivalitet edhe në këtë drejtim mes Cristiano Ronaldos e Leo Messit. Për momentin, portugezi ka shënuar 15 gola më shumë se argjentinasi në Champions (127 me 112). I treti është Raúl, me 41 gola larg Messit, ose me 56 gola larg CR7. I katërti, Benzema, që ka realizuar më pak se gjysmën e golave të Ronaldos.

Më shumë gola në një vit: LEO MESSI

Ylli argjentinas shënoi 90 gola në vitin 2012, duke mposhtur rekordin e Müller në vitin 1972, me 5 gola më tepër. Mesi, gjithashtu, është golashënuesi më i mirë në një sezon, me 82 gola (2011-2012). Kjo shifër tregon shtatë gola më shumë sesa shënoi Pelé në sezonin 1957-1958.

Më shumë Kupa europiane të fituara: PACO GENTO

Paco Gento e kryeson këtë listë, me gjashtë Kupa Europiane të fituara te Real Madridi. Me nga pesë trofe të tillë janë 11 lojtarë: Di Stéfano, Rial, Zárraga, Marcos Alonso, Lesmes, Juanito Alonso, Santisteban, Mateos, Maldini, Costacurta dhe Cristiano Ronaldo. Nga të gjithë ata, vetëm Cristiano është akoma aktiv, kështu që portugezi duket më i afërti me rekordin e Gento. Nga grupi që kanë nga katër Kupa Europiane (sot, Champions): Messi, Piqué, Ramos, Marcelo, Varane, Kroos, Benzema, Carvajal, Isco, Nacho, Modric, Casemiro dhe Bale, janë në gjendje ta rrisin këtë numër.

Më shumë Botërorë të fituar: PELÉ

Jo më pak se tri, janë Kupat e Botës së fituara nga Pele: 1958, 1962 dhe 1970. Nëse tashmë është e vështirë të fitosh një trofe të tillë, për yje si Messi, CR7, Cruyff, Di Stefano dhe shumë më tepër, tri Kupa Bote mbeten të paarritshme. Një rekord që eklipson çmimet individuale të Messit dhe Cristiano Ronaldos, të dy me nga pesë “Topa të Artë”.