Noele Illien – Al Jazeera
Më pak se një vit më parë, Valentina mori vendimin për të zëvendësuar shallin e saj me një nikab.
“Ndihem më mirë dhe më e sigurt ndërsa e kam veshur”, tha ajo. “Është gjithashtu një akt adhurimi.”
Për këtë 32-vjeçare nga Zvicra që dëshiron që ne t’i drejtohemi vetëm me emër, e veshur me nikab – një vello që mbulon pjesën e poshtme të fytyrës – është një zgjedhje personale.
“Unë e vesh për vete, jo si një simbol për botën e jashtme”, tha ajo.
Por Valentina mund të mos jetë në gjendje të mbajë nikabin për shumë kohë.
Zviceranët do të votojnë në një referendum në 7 mars që mund të sjellë një ndalim të “veshjes së kapelës”, siç është nikabi, në publik.
Ky ligj, të cilin vendasit e quajnë “ndalim të burkes”, nuk përmend në mënyrë të qartë llojin që mbajnë femrat myslimane, por konsiderohet se u drejtohet atyre.
Ligji i propozuar përcakton se “askush nuk duhet të mbulohet në publik” dhe se “askush nuk lejohet të detyrojë dikë të mbulojë një person në bazë të gjinisë”.
Ka përjashtime, siç janë arsyet shëndetësore dhe traditat të tilla si karnavalet.
Sondazhet në mediat lokale reflektojnë se votuesit do të miratojnë ligjin me një diferencë të ngushtë, një veprim që disa anëtarë të pakicës muslimane besojnë se i përjashton ata nga shoqëria.
Kush qëndron pas këtij propozimi?
Nisma për të ndaluar mbulimin e fytyrës u nis nga Komiteti Egerkinger, një grup që përfshin politikanë nga Partia Popullore Zvicerane (SVP) e krahut të djathtë, e cila thotë se po organizon “rezistencë kundër pretendimit për pushtet nga Islami politik në Zvicër”.
Ky grup mbron pikëpamjen se “burrat e lirë tregojnë fytyrat e tyre” dhe se “burka dhe nikabi nuk janë rroba normale” por për të simbolizuar shtypjen e grave.
Në vitin 2017, ky grup mblodhi 100,000 nënshkrimet e kërkuara për referendumin, i cili do të mbahet më 7 mars.
Për Andreas Tunger-Zanetti, një studiues i Islamit në Universitetin e Lucernës dhe autor i një debati për burkan në Zvicër, referendumi nuk ka të bëjë vetëm me një rrobë.
“Kjo ka të bëjë me menaxhimin e diversitetit,” tha ai. “Kjo është një çështje e diskutueshme për shumë në Zvicër sepse nuk ka më profile të qarta identiteti që njerëzit mbajnë mend nga rinia e tyre”.
Tunger-Zanetti thotë se burka është një shënjestër e lehtë që përbën një “kërcënim” për diversitetin, sepse votuesit zviceranë pa dyshim e lidhin atë me Islamin.
Sipas statistikave zyrtare, ka afër 380,000 muslimanë që jetojnë në Zvicër, rreth 5 përqind e popullsisë dhe shumë prej tyre i kanë rrënjët në Ballkan.
Nuk ka statistika zyrtare për gratë që mbajnë veshje në kokë, , por Tunger-Zanetti thotë se shifrat janë të vogla.
Vitin e kaluar, ai zhvilloi një sondazh midis figurave kryesore në komunitetin musliman zviceran, ku pyeti se sa gra njohin ata që janë mbuluar plotësisht fytyrat e tyre.
“Ky hulumtim ka zbuluar se nuk ka burka në Zvicër,” tha Tunger-Zanetti.
Ai tha se midis 21 dhe 37 gra mbajnë nikab.
“Është e vështirë të shohësh se si mund të shitet kjo si një islamizim i pretenduar,” shtoi ai.
