Një shtetas indian i shumë kërkuar nga drejtësia amerikane si pjesë i një grupi të organizuar që merrej me trafikun ndërkombëtar të lëndëve narkotike është arrestuar sot në aeroportin e Rinasit.
Operacioni është rezultat i bashkëpunimit të agjencive të ndryshme si RSO/DSS, Policia e Shtetit dhe DEA, ndërkohë që 31-vjeçari me inicialet N.M pritet të ekstradohet në Shtetet e Bashkuara.
Sipas deklaratës zyrtare, është njësia speciale shqiptare “Mburoja e Përbashkët” ajo që ka kryer hetime paraprake në koordinim të vazhdueshëm, si me Zyrën Rajonale të Sigurisë të ambasadës amerikane në Tiranë, ashtu edhe me zyrtarë të DEA-s në Shqipëri.
Policia e Shtetit, në bashkëpunim me Ministrinë e Drejtësisë dhe Prokurorinë e Përgjithshme, është duke punuar për ekstradimin e këtij shtetasi drejt SHBA-së.
E përbërë nga oficerë të policisë shqiptare dhe amerikane, njësia “Mburoja e Përbashkët” bën hetime të përbashkëta për të gjurmuar krime që prekin të dy shtetet në fushën e kontrabandës të trafikut të njerëzve, narkotrafikut, terrorizmit, dhe çështje të ngjashme.
