Pas seancës që zgjati vetëm pak minuta mes kaosit dhe rrëmujës, Lulzim Basha foli për një marrëveshje të dakordësuar me qeverinë për nisjen e shpejtë të punës së komisionit bipartizan të reformës zgjedhore.
“Fatkeqësisht edhe dita e sotme provoi që interesat e qeverisë nuk është llogaridhënia por vazhdimi i teatrit me skenar dhe regji të Edi Ramës që pamundëson zërin e opozitës. Sot, kam një thirrje për Presidentin e Republikës; të kthejë mbrapsht ndryshimet e njëanshme të ligjit për komisionet hetimore, të zhbëhet ndryshimi i rregullores.
Ndërkohë që në bashkëpunim me faktorin ndërkombëtar, përfaqësuesit e të cilit dëshiroj ti falenderoj ia kemi dalë të hedhim një hap të parë modest sa i takon prioritetit kryesor për largimin e papërgjegjshmërisë politike nga skena politike përmes reformës zgjedhore dhe të paktën për momentin duket se në bashkëpunim me aleatët strategjik të Shqipërisë, PD si udhëheqëse e këtij procesi në kuptimin thelbësor të fjalës, ia ka dalë që të bindë palën tjetër për të nisur punën në komisionin bipartizan të reformës zgjedhore”, tha Basha për gazetarët.
Pyetje: Kur?
Basha: Detajet do të bëhen shumë shpejt publike, por dua të falenderoj SHBA, BE-në dhe Britaninë e Madhe që kanë ndihmuar jo vetëm opozitën, PD-në në këtë drejtim, por edhe një interes publik të jashtëzakonshëm që është shkatërrimi i skenarëve për të zvarritur edhe njëherë procesin e reformës zgjedhore. Se kur do të mblidhet komisioni këtë do ta shikoni, por ne insistojmë që puna në komision të jetë publike.
Basha nuk mohoi takimin mes Alibeajt dhe Gjiknurit si dhe letrën e dërguar nga ana e të dyve OSBE-së, për asistencë teknike dhe ekspertë në realizimin e reformës zgjedhore.
Pyetje: Nënkryetari juaj ka nënshkruar një letër bashkë me Damian Gjiknurin drejtuar OSBE-së. Janë takuar Alibeaj dhe Gjiknuri, ku dhe kur dhe pse mbahen këto takime sekrete?
Basha: Asgjë nuk ka dhe nuk do të ketë sekrete. PD insiston që gjithë debati për reformën zgjedhore të bëhet publik, por është në interes publik që ky debat të mos vonohet më.
