Zjarrfikësit italianë janë duke kërkuar në lumin Koza pranë Frosinones armën me të cilën u vra shqiptari 27-vjeçar Kasem Kasmi dhe u plagosën 3 të tjerë mbrëmjen e së shtunës.
Ishte autori 23-vjeçar Mikea Zaka që u tha hetuesve se pistoletën e hodhi në lumë pasi masakrës në një lokal të zonës.
Hetuesit u janë rikthyer edhe një herë pamjeve të kamerave të sigurisë në lokalin ku ndodhi ngjarja.
Kjo pasi Zaka këmbëngul se arma nuk ishte e tij dhe se atë ia kishte rrëmbyer viktimës që e kishte sulmuar i pari së bashku me vëllain dhe 2 miqtë e tij.
Në filtër po kalojnë edhe motivet. Hetuesit nuk janë të bindur nga fjalët e autorit se shkak ishte një vajzë kjo pasi 23-vjeçari ka qenë nën hetim për trafik droge dhe gjatë një ndalimi pak muaj më parë i janë gjetur 20 mijë euro Cash. Ansa raporton për një përplasje mes bandave.
Në gjendje të rëndë në spital është edhe vëllai i viktimës, Ervini ndërsa dy miqtë e tyre janë jashtë rrezikut për jetën.
