Kosova A është Gjermania, vendi europian që mallkon Vuçiç?

A është Gjermania, vendi europian që mallkon Vuçiç?

Nga Enver Robelli

Sundimtari i Serbisë, Aleksandar Vuçic, duke vajtuar dhe akuzuar Gjermaninë (pa e përmendur direkt) se pengoi planin që Beogradi të merrte veriun e Kosovës dhe Anamoravën.

“Ky ka qenë një shans i madh për ne. E kemi humbur këtë rast”, tha Vuçic për televizionin Happy.

Përkrahësit e ideve të Vuçicit në Prishtinë prej verës së vitit 2018 kanë thënë se Kosova do të marrë Luginën e Preshevës dhe nuk do të japë “asnjë milimetër, asnjë centimetër territor”.

Me mbështetjen e Federica Mogherinit, lobistëve të paguar mirë dhe diplomatëve të pensionuar, por të etur për honorare, viteve të fundit në tavolinë është vendosur harta e Kosovës dhe janë bërë plane për copëtimin e saj.

Duke folur për dështimin e planeve të tij, Vuçic përmend presionin që ka pasur nga Europa dhe sidomos nga një shtet i fuqishëm për të realizuar marrëveshjen për energji.

Për çka flet këtu Vuçiç? Flet për linjën e interkonjeksionit mes Kosovës dhe Shqipërisë, një projekt i financuar nga një bankë gjermane dhe qeveria e Berlinit, dhe i bllokuar nga Beogradi.

Kjo linjë do ta bënte Kosovën më të pavarur nga importi i energjisë nga Serbia, edhe çmimi i rrymës, sipas eskpertëve, do të ulej.

Tregu i energjisë në Ballkan në pjesë të madhe kontrollohet nga oligarkët serbë.

Ata kanë lidhje me politikanë e oligarkë në të gjitha vendet e rajonit.

Andaj viteve të fundit ka pasur akuza se edhe qeveria e Sali Berishës e ka penguar linjën e interkonjeksionit mes Kosovës dhe Shqipërisë.

Por projektin nuk ka arritur ta shtyjë përpara as qeveria aktuale e Tiranës, për shkak të bllokadave serbe.