Ditën e nesërme para Parlamentit do të zhvillohet protesta e radhës e opozitës në të njëjtën kohë që betohen 4 nga deputetë e “opozitës së re” që po formësohet pasi Lulzim Basha dhe aleatët e tij vendosën të djegin mandatet.
Pritet që njëjtë me 3 protestat paraardhëse, ajo e nesërmja të shoqërohet me incidente, dhunë dhe përplasje me policinë, ndaj Ambasada Amerikane ka reaguar duke njoftuar qytetarët e saj që të shmangin kalimin përgjatë akseve ku do të zhvillohet tubimi opozitar.
“Demonstrata pritet të ndodhë kur Kuvendi i Shqipërisë të mblidhet në seancë.
Grupi demonstron kundër qeverisë. Kohëzgjatja e demonstratave është e panjohur.
Forcat e sigurisë kanë përdorur ujë dhe gaz lotsjellës gjatë protestave të fundit. Shmangni pikat e grumbullimit dhe vendet ku demonstratat janë të pashmangshme ose të vazhdueshme”, thuhet në reagimin e Ambasadës Amerikane.
