Tetë bashki në vend konsiderohen “covid free” nga specialistët e Intitutit të Shëndetit Publik. Në një intervistë për Televizionin Klan, Artan Simaku, thotë se prej disa javësh në këto bashki nuk është regjistruar asnjë rast i ri me Covid.
“Në rang vendi ka një rënie në të gjitha bashkitë e vendit. Dy javët e fundit zona pa raste janë Puka, Bulqiza, Klosi, Fushë Arrëzi, Belshi, Peqini, Ura Vajgurore dhe Divjaka”.
Ekspertët parashikojnë që situata e koronavirusit në vend të vijojë të jetë e qëndrueshme dhe me raste gjithmonë në rënie.
“Ky trend rënës parashikohet që të vazhdojë pasi ka rënë numri i rasteve të reja, ka rënë dhe përqindja e pozitiviteti, ka rënë edhe numri i personave të shtruar. Numri i rasteve fatale është i qëndrueshëm dhe në trend rënës. Ky trend parashikohet të vazhdohet edhe në javët në vijim”.
Vaksinimi dhe imunizimi natyror sipas ekspertëve po ndikon në përmirësimin e shifrave të Covid-19 në vend, por ato apelojnë sërish për respektim të masave antiCovid.
