Aktualitet Balluku inspekton punimet për ujësjellësin e ri të Shijakut: 128 kantieret e...

Balluku inspekton punimet për ujësjellësin e ri të Shijakut: 128 kantieret e hapura përfundojnë para afatit

Në Bashkinë e Shijakut punimet për ndërtimin e ujësjellësit të ri kanë avancuar me ritme të shpejta, duke bërë që kjo vepër të jetë plotësisht në funksion në muajin janar të vitit të ardhshëm. Ky investim do të përfundojë plotësisht 5 muaj para afatit të parashikuar në kontratën e punimeve, duke i dhënë fund në këtë mënyrë një problematike të mbartur prej vitesh për banorët e kësaj bashkie.

Ujësjellësi aktual është ndërtuar në vitet ’80-të dhe për shkak të mungesës së investimeve, rrjeti shpërndarës ishte amortizuar plotësisht. Për vite me radhë, banorët e Shijakut kanë vuajtur mungesën e furnizimit me ujë të pijshëm, pasi oraret kur ky shërbim ofrohej ishin tepër të reduktuara. Gjithashtu, niveli i lartë i humbjeve si dhe ndërhyrjet abuzive ndikonin drejtpërdrejt në performancën e drejtorisë së ujësjellësit. Përmes një investimi në vlerë 2.7 milionë euro e gjithë kjo situatë do të ketë një panoramë krejt tjetër.

Ministrja e Infrastrukturës dhe Energjisë, Belinda Balluku, e shoqëruar nga Drejtori AKUM, Alqi Bllako, drejtori i OSHEE, Adrian Çela dhe kryetari Bashkisë së Shijakut, Elton Arbana inspektuan punimet ku deri më tani janë realizuar afro 70% e tyre, ndërsa përfitues direkt të këtij investimi janë afro 13.300 banorë.

“Investimi konsiston në rehabilitimin tërësor të rrjetit të brendshëm, janë pothuajse 36 kilometra rrjet i brendshëm që zëvendësohen, ndërtohet një depo e re 2 mijë metra kub, rikonstruktohet tërësisht stacioni pompimit, si dhe rikonstruktohet depo shpërndarëse. Do instalohen 3600 matësa për konsumatorët individualë, në mënyrë që të mos abuzohet me konsumin, gjithashtu do të kemi matje të saktë të konsumit si dhe do të instalohet sistemi SCADA”, u shpreh kreu i AKUM, Alqi Bllako.

Për kryebashkiakun Arbana mungesa e furnizimit me ujë të pijshëm ka qenë një shqetësim për banorët e kësaj bashkie teksa shtoi se ky projekt, së bashku me projektin e rindërtimit, janë dy ndër investimet kryesore që po bëhen në këtë zonë.

Ministrja Belinda Balluku theksoi se kantieret për ndërtimin e ujësjellësave të rinj janë shtrirë në të gjithë vendin, ndërsa me buxhetin e ri, duke nisur nga pranvera e vitit të ardhshëm, do të hapen edhe 70 kantiere të rinj. Përfundimi i të gjithë këtyre investime, do të garantojë furnizim 24 orë me ujë të pijshëm për të gjitha zonat urbane në vend, si dhe për 200 zona rurale.

“Kemi arritur sot në shifrën e 128 kantiereve për të vazhduar më pas gjatë vitit të ardhshëm, 2021. Me buxhetin e ri që kemi marrë, ujit i është dhënë një vëmendje e veçantë, pasi ne na është miratuar nga Ministria e Financave rreth 85% e nevojës që ne kërkuam dhe kjo është një shifër shumë e lartë, duke pasur parasysh që ky është një vit i vështirë dhe vijmë nga një vit i vështirë. Ne do jemi eficent dhe të gjitha kantieret do dorëzohen para afatit dhe kjo është e rëndësishme”, theksoi Balluku.

Të gjitha investimet që po realizohen, nënvizoi ministrja e Infrastrukturës dhe Energjisë, janë investime të mirë studiuara dhe të integruara mes tyre të cilat kanë në fokus përmirësimin e shërbimit ndaj qytetarëve.

“Ne nuk bëjmë investime të ndara. Janë investime të integruara ku padyshim mbështetet si energjia dhe çdo shërbim tjetër, si shërbimi jetik i ujit. Janë investime të cilat po përfundojnë para afatit, sepse ne duam t’i japim shërbim qytetarëve. Unë shpresoj që të gjitha bashkë, me një koordinim të plotë, si pushteti lokal, ashtu edhe ndërmarrjet apo agjencitë e Ministrisë së Infrastrukturës dhe Energjisë, në mënyrë të koordinuar, mund të kemi një rezultat të shkëlqyer përsa i përket shërbimeve jetike që qytetarët e Republikës së Shqipërisë duhet të marrin”, u shpreh Balluku.

Drejtori i OSHEE, Adrian Çela tha se investimet që po realizohen e kanë kthyer qarkun e Durrësit në një kantier të madh, ku përfundimi i të gjitha projekteve që po realizohen do të ofrojnë një tjetër pamje për zonën dhe do të përmirësojnë cilësinë e shërbimit ndaj qytetarëve.

“I gjithë qarku i Durrësit është kantier, rindërtimi nga tërmeti, investimet në ujësjellës dhe investimet në energjetikë. Janë fshatrat e të gjitha zonave rurale ku po investohet në ujësjellës. Qyteti i Durrësit ka një linjë të re furnizimi të dedikuar. Nga ana tjetër, janë investimet në energjetikë që ne po bëjmë. Kemi pasur një stopim një vit për shkak të thatësirës, sepse u detyruam të importonim energji, por tani që u çliruam pak. Demonstrim i parave që qytetarët paguajnë, ne ja kthejmë me investime, si për ujin, dhe energjinë”, u shpreh Çela.

Sa i takon Bashkisë së Shijakut, pranverën e ardhshme do të nisin punimet edhe për ujësjellësin i cili furnizon zonën e Maminasit duke garantuar edhe për banorët e kësaj zone furnizim të pandërprerë me ujë të pijshëm.