Politika Basha: Nuk do ketë zgjedhje me Ramën kryeministër dhe pa opozitën

Basha: Nuk do ketë zgjedhje me Ramën kryeministër dhe pa opozitën

“Me Edi Ramën si Kryeministër dhe pa opozitën nuk do të ketë zgjedhje më 30 Qershor”.

Kështu ka deklaruar kryedemokrati Lulzim Basha gjatë fjalës së tij në aktivitetin e koalicionit opozitar ku u prezantuan detyrat e qeverisë tranzitore.

“Kemi ndërmarrë këtë hap sot pasi e kemi të qartë se zgjedhje me Edi Ramën kryeministër nuk do të ketë. Zgjedhje pa opozitën nuk mund të ketë. Zgjedhjet pa opozitën janë farsë. Vetëm zgjedhjet e lira dhe të ndershme do t’i kthejnë legjitimitetin Shqipërisë. Parlamenti është kthyer në një vegël të oligarkisë”, u shpreh kryetari i Partisë Demokratike, Lulzim Basha.

Ish-deputeti dhe eksperti ligjor i PD-së, Oert Bylykbashi bëri publike platformën për zgjedhje të lira dhe detyrat e qeverisë tranzitore.

DETYRAT E QEVERISË TRANZITORE:

1- Goditje me tolerancë zero e strukturave politike dhe kriminale të përfshira në shitblerjen e votës, intimidimin e votuesve dhe manipulimin e zgjedhjeve.

2- Ndalim i presionit qeveritar mbi drejtësinë për t’i hapur rrugë hetimit të bashkëpunimit mes krimit të organizuar dhe pushtetarëve për manipulimin e zgjedhjeve.

3- Monitorim i rreptë dhe goditje me tolerancë zero ndaj presionit mbi administratën publike dhe zgjedhësit.

4- Ndalim i prokurimeve, tenderave, koncesioneve\PPP-ve, licensave, favoreve dhe abuzimeve të tjera me burimet shtetërore.

5- Kontroll dhe marrje masash për emërimet dhe shkarkimet e paligjshme nga administrata publike dhe kompanitë shtetërore, si dhe për ndryshimet e paligjshme në listat e ndihmës ekonomike, personave me aftësi të kufizuar etj.

6- Pajisje e shtetasve me letërnjoftime, skema lehtësuese dhe hetim penal i fallsifikimeve të letërnjoftimeve.

7- Regjistrim i adresave të të gjithë shtetasve dhe hartim me integritet i listave të zgjedhësve.

8- Hetim dhe ndëshkim me tolerancë zero i votimit fiktiv të emigrantëve.

9- Shkëputje e lidhjes së policisë me krimin, goditje e policëve të inkriminuar, angazhim i policisë kundër krimit zgjedhor dhe garantim i sigurisë në zgjedhje.

10- Raportim me transparencë i veprimtarisë ligjzbatuese dhe akses i besueshëm për opozitën.