Politika Basha: Ps e Shkodrës u dorëzua tek Tom Doshi dhe trafikanti Pëllumg...

Basha: Ps e Shkodrës u dorëzua tek Tom Doshi dhe trafikanti Pëllumg Gjoka

Kryetari i Partisë Demokratike, Lulzim Basha, ka ardhur me një reagim në rrjetin e tij social “Facebook”, ku në vëmendje sjell debatin mes kupolës së PS në Shkodër dhe shprehet se partinë që qeveris vendin, e drejton Tom Doshi dhe e cilëson Pëllumb Gjokan si bashkëpunëtor të bandës se Bajrave.

Në postimin e tij ai shkruan:

“Dje mbarë opinioni publik u njoh me debatin mes kupolës së PS në Shkodër nga ku del qartë se partinë që qeveris vendin, e drejton Tom Doshi, dhe se votat për partinë e Edi Ramës i siguron krimi i organizuar.

Gjatë debatit të socialistëve me Senida Mesin, për të mos ia dorëzuar Shkodrën Tom Doshit siç urdhëronte Edi Rama, flitet për votat e siguruara në Velipojë. Senida Mesi ua mohon kontributin socialistëve dhe ia njeh atë një personi jashtë Partisë Socialiste.

Ky person është Pëllumb Gjoka, një nga trafikantët më të fuqishëm të drogës në zonën e Velipojës dhe të Shkodrës, bashkëpunëtor i bandës të Bajrave. Në Tiranë ai vesh kostumin e biznesmenit që gëzon mbështetjen e Edi Ramës. Për Edi Ramën narkotrafikanti Pëllumb Gjoka mbledh vota, në restorantin e tij në qendër të Tiranës, Edi Rama darkon me familjen dhe fton shpesh miq të huaj.”

Kryetari i PD-së thotë gjithashtu në postimin e tij se Pëllum Gjoka është ortak me Tom Doshin të disa pronave dhe thotë gjithashtu se Gjoka është shkuesi i Edi Ramës me bandën e Bajrave në Shkodër.

“Pëllumb Gjoka është ortak me Tom Doshin në një nga hotelet më luksoze pranë bllokut të ambasadave, ku janë pastruar paratë e trafiqeve të miqve kriminelë të Edi Ramës që i sigurojnë atij pushtetin.

Edi Rama është angazhuar personalisht për të ndaluar hetimin e pasurive të tyre sipas ligjit Antimafia, sepse Pëllumb Gjoka është shkuesi i Edi Ramës me bandën e Bajrave në Shkodër, ndërsa Tom Doshi është ai që menaxhon çdo pushtet të Partisë Socialiste në kryeqendrën e Veriut.

Dëshmia e Senida Mesit se votat për Edi Ramën në Velipojë i mbledh një trafikant droge që pastron paratë e krimit në Tiranë, rikonfirmon se vendi qeveriset nga një kryeministër i kapur nga krimi.”

Basha e mbyll reagimin e tij duke i’u drejtuar Kryeministrit të vendit, dhe shprehet se ai përdor krimin për të vjedhur zgjedhjet dhe bashkë me krimin pasurohet në mënyrë të paligjshme.

“Hajduti Psiqik e përdor krimin për të vjedhur zgjedhjet, dhe bashkë me krimin pasurohet në mënyrë të paligjshme duke vjedhur shqiptarët dhe duke pastruar paratë e krimit. Ndaj për sa kohë që në krye të qeverisë të jetë Edi Rama, shqiptarët mbeten të varfër, të papunë e të dhunuar.

Hajduti Psiqik përbën rrezik për jetën dhe sigurinë e çdo familje shqiptare. Ai dhe krimi i organizuar janë të pandashëm. Që të shpëtojmë Shqipërinë nga kriminelët me pushtet, duhet të largojmë Edi Ramën.”