Bota Berlusconi do të garojë në zgjedhjet evropiane: Europa të rikthehet te projekti...

Berlusconi do të garojë në zgjedhjet evropiane: Europa të rikthehet te projekti i etërve themelues

Ish-kryeministri italian, Silvio Berlusconi kërkon rikthimin. E ndërsa në politikën e brendshme nuk ka mundur të gjejë ende hapësirat e duhura, ai po i kthen sytë tani nga zgjedhjet europiane.

Ai ka deklaruar se do të kandidojë në zgjedhjet e majit për Parlamentin Europian, sepse do të luftojë për një BE më të bashkuar, besnike ndaj vizionit të themeluesve të bllokut.

Berlusconi foli në një konventë të partisë së tij të qendrës së djathtë, “Forza Italia”, që vitet e fundit ka njohur një rënie të mbështetjes, pasi votat i kanë shkuar partive të djathta euroskeptike dhe me mesazhe antiemigrantë, veçanërisht “Lega Nord”-it.

“Me politikat e saj të kursimit, burokracitë e saj, kufizimet e shumta që u janë vendosur shteteve, paratë që u merren shteteve dhe shpenzohen keq…Europa duhet të ndryshojë, e për ta ndryshuar atë, aleancat duhen ndryshuar”, tha Silvio Berlusconi, president i “Forza Italia”.

Në një tubim të mbajtur në Romë, me rastin e 25-vjetorit të partisë së tij, Berlusconi tha se, pavarësisht moshës së tij të thyer tashmë, ai do të hynte në zgjedhjet europiane.

“Duket se, nevoja e pranisë sonë të rëndësishme brenda Partive Popullore Europiane është më e madhe sesa kurrë. Kjo më ka shtyrë të provoj sërish, pavarësisht moshës sime të shkuar, të jem i pranishëm në Bruksel për të luftuar edhe këtë betejë të radhës”, tha Silvio Berlusconi.

Sidoqoftë, Berlusconi tha të shtunën se ai do të luftojë që Europa të rikthehet te projekti i etërve themelues, që donin një union më të bashkuar, një Europë me një politikë të jashtme dhe me një politikë të përbashkët të mbrojtjes.