Bota Berlusconi: SHBA nuk e ruan dot më rendin botëror, Europa duhet të...

Berlusconi: SHBA nuk e ruan dot më rendin botëror, Europa duhet të ketë autonomi

Bashkimi Europian duhet të ketë një politikë të jashtme të veten, pavarësisht aleancës me Shtetet e Bashkuara. Kështu thotë ish-kryeministri italian, Silvio Berlusconi, gjatë një takimi virtual të Partive Popullore Europiane.

Sipas liderit të “Forca Italia”, Europa sot është një domosdoshmëri. “Në sfidat e mëdha planetare do të kemi mundësi të ruajmë interesat tona vetëm nëse jemi të bashkuar. Shtetet e Bashkuara nuk janë më në gjendje që të ruajnë rendin botëror”, tha Berlusconi.

“Përvoja e dhimbshme e Afganistanit konfirmoi në mënyrë dramatike dy aspekte gjithnjë e më të dukshme të shekullit XXI. I pari është që Shtetet e Bashkuara mbeten miq dhe aleatë thelbësor, por nuk janë më në gjendje të garantojnë të vetëm rendin liberal botëror. Aspekti i dytë është që Europa, deri kur të mos ketë një politikë të jashtme të bashkuar, të mbështetur nga një instrument ushtarak europian i fortë, nuk do të jetë në gjendje të kryejë rolin e vet autonom”.

Berlusconi shtoi gjithashtu se e ardhmja e Europës duhet të bazohet në parimet e njerëzve që e bën të madh kontinentin në të shkuarën, si personazhet kryesorë të viteve të pasluftës (L2B) Adenauer, Schumann, De Gasperi, etj.