Kryeministrja britanike, Theresa May po përgatitet të dënojë ashpër kërkesat në rritje në Britaninë e Madhe për një referendum të dytë për çështjen Brexit, e konsideruar si zgjidhje e mundshme e ngërçit politik në sfondin e kontradiktave kundrejt marrëveshjes së divorcit të arritur me Brukselin.
“Ne nuk e thyejmë besimin e popullit britanik duke u përpjekur për të organizuar një referendum të ri, për Brexit”, pritet të thotë kryeministrja britanike në një deklaratë drejtuar deputetëve në Dhomën e Komuneve.
“Një proces i ri zgjedhor do të shkaktonte dëme të pariparueshme për integritetin e politikës sonë”, vlerëson ajo në një pjesë të shkëputur dhe transmetuar paraprakisht nga shërbimet e saj.
”Ky referendum i dytë me shumë mundësi nuk do të na çonte përpara dhe do të përçante edhe më tej vendin, ndërkohë që po përpiqemi ta unifikojmë”, sipas saj.
Britania e Madhe u shpreh me votë, 52%, në mbështetje të alternativës për daljen nga Bashkimi Europian në referendumin e qershorit 2016.
