Politika Burgosja e tre protestuesve të “Astirit”, Basha i bashkohet sot protestës  

Burgosja e tre protestuesve të “Astirit”, Basha i bashkohet sot protestës  

Kryetari i Partisë Demokratike Lulzim Basha akuzon Kryeministrin Edi Rama për burgosjen e tre protestuesve të “Astirit”, të cilët akuzohen për bllokimin e rrugës.

Në një postim në Facebook, kryedemokrati shkruan se Skënder Doda, Gramoz Shehu dhe Ilias Katiraj u lanë në arrest me burg sepse dolën në mbrojtje të shtëpive të tyre.

Lulzim Basha thotë se në orën 18:00 do të jetë tek Unaza e Re për t’iu bashkuar protestuesve të “Astirit”.

“Me urdhër të Edi Ramës, gjyqtari Arben Micko dhe prokurori Bledar Maksuti mbajtën sot në arrest Skënder Dodën, Gramoz Shehun dhe Ilias Katiraj. Tre baballarë mbahen në burg sepse mbrojnë shtëpitë e fëmijëve nga Hajduti Psiqik, Damian Lala dhe Taulant Yaris Bego që duan të vjedhin 40 milionë euro te Unaza e Re.

Sot Edi Rama duhej të ishte në burg për veprën kriminale të pastrimit të parave dhe ndërhyrjes me para të pista në fushatën e Presidentit Obama. Damian Lala dhe Taulant Yaris Bega duhet të ishin në qeli, bashkë me Sajmir Tahirin për aferat e tyre hajdutërore dhe bashkëpunim me narkotrafikantët. Me hajdutë në qeveri dhe njerëz të pafajshëm në burg, nuk ka Europë, as zhvillim, as drejtësi. Vetëm largimi i kësaj bande hap rrugën drejt normalitetit dhe mirëqenies.

Sot në ora 18:00 të bashkohemi në protestë në krah të banorëve të dhunuar te Unaza e Re, kundër hajdutërisë dhe padrejtësisë”, shkruan kryetari i PD Lulzim Basha.