Kryesore Dështojnë negociatat mes grupit të Berishës dhe Bashës për të dalë me...

Dështojnë negociatat mes grupit të Berishës dhe Bashës për të dalë me një kandidat të përbashkët të PD në zgjedhje

Negociatat mes Gazment Bardhit dhe Edi Palokës për të dalë me një kandidat të përbashkët të Partisë Demokratike në zgjedhjet e 14 Majit kanë dështuar. Kjo është bërë e ditur nga një njoftim zyrtar nga grupi i drejtuar nga Enkelejd Alibeaj.

Një njoftim thuhet se grupi i drejtuar nga Enkelejd Alibeaj “shpreh keqardhjen që në kundërshtimin me zotimin për bisedime pa kushte”, sipas grupit të drejtuar nga Alibeaj u vendos “kushti për të njohur statutin e vendosur nga “Kuvendi i 11 Dhjetorit i PD-së”.

Në njoftim thuhet se është “refuzuar vazhdimisht çdo propozim” i bërë nga ana e grupit të drejtuar nga Alibeaj dhe kjo sipas tyre është “tregues i mungesës së sinqeritetit dhe vullnetit për të gjetur zgjidhje”.

Mes të tjerash, grupi i drejtuar nga Alibeaj thekson se “fakti që ndërsa palët ishin në bisedime mes tyre, njëra palë vijonte me akte të njëanshme apo me deklarata publike të disa përfaqësuesve politik që shkonin në frymën e nxitjes së dështimit të bisedimeve mes palëve”.

Grupi i drejtuar nga Enkelejd Alibeaj ka kërkuar të informohet Kryesia e Partisë Demokratike, kjo me qëllim që sipas tyre “t’i hapë rrugë krijimit të të gjitha kushteve për përgatitjen dhe pjesëmarrjen e Partisë Demokratike në zgjedhjet e ardhshme vendore.”

Kryetari i Këshillit Kombëtar të PD-së, Edi Paloka dhe deputeti i PD-së Gazmend Bardhi u mandatuan si negociatorë nga palët për të dalë me një kandidat të përbashkët në PD në zgjedhjet e 14 Majit.

Njoftimi i grupit të drejtuar nga Enkelejd Alibeaj:

“Më datë 10 Tetor Grupi Parlamentar i Partisë Demokratike në mënyrë unanime shprehu vullnetin e plotë dhe të sinqertë për të gjetur format e duhura të bashkëpunimit për zgjedhjet lokale fillimisht duke nisur me të gjithë Partinë Demokratike dhe me çdo faktor opozitar.

Kjo mundësi e sinqertë për bashkëpunim, me qëllim bashkimin e çdo zëri opozitar dhe përballja me një kandidat të vetëm të PD dhe opozitës në zgjedhje, në vlerësimin e Grupit Parlamentar të PD, ishte zgjidhja e vetme për tu përballur me regjimin e Edi Ramës në zgjedhjet lokale.

Ne shprehim keqardhjen që në kundërshtim me zotimin publik për “bisedime pa kushte”, prevaloi interesi dhe kushti për të njohur “Statutin” e 11 Dhjetorit, duke minuar në këtë mënyrë bisedimet për të gjetur zgjidhje për zgjedhjet lokale. Anëtarët, simpatizantët dhe votuesit e Partisë Demokratike, janë të lodhur nga debati “kush është statuti në fuqi i Partisë Demokratike”. Ato kërkojnë zgjidhje për të unifikuar çdo zë opozitar përballë Edi Ramës në zgjedhje lokale. Humbja e kësaj mundësie me kokëfortësi dhe duke injoruar situatën e rëndë që po kalon Partia Demokratike, nuk është në interes të qytetarëve dhe dobëson alternativën e opozitës në zgjedhjet lokale të 14 Majit.

Refuzimi i vazhdueshëm i çdo propozimi të bërë nga ana jonë, përfshirë propozimin final të paraqitur edhe me shkrim, është tregues i mungesës së sinqeritetit dhe vullnetit për të gjetur zgjidhje. Ky refuzim provon paramendimin për të mos gjetur zgjidhje dhe vënien para faktit të kryer të palës tjetër. Kjo bëhet evidente nga fakti që ndërsa palët ishin në bisedime mes tyre, njëra palë vijonte me akte të njëanashme apo me deklarata publike të disa përfaqësuesve politik që shkonin në frymën e nxitjes së dështimit të bisedimeve mes palëve.

Nisur nga kjo situatë, Grupi Parlamentar i Partisë Demokratike ka kërkuar të informohet Kryesia e Partisë Demokratike, për ti hapur rrugë krijimit të të gjitha kushteve për përgatitjen dhe pjesëmarrjen e Partisë Demokratike në zgjedhjet e ardhshme vendore”.