Presidenti turk Rexhep Tajip Erdogan tha të hënën se Turqia dhe Shtetet e Bashkuara po hyjnë në një “epokë të re” të marrëdhënieve që janë përkeqësuar në vitet e fundit për shkak të një numri çështjesh, edhe pse të dy vendet janë aleatë në NATO, raporton AP.
Erdogan u bëri thirrje Shteteve të Bashkuara për të respektuar të drejtat sovrane të Turqisë, e cila është një aludim i qartë për vendimin e tij për të blerë sistemin e armëve ruse dhe kërkoi mbështetjen e SHBA për luftën e Ankarasë kundër grupeve kurde në Siri, të cilat Turqia i konsideron terroristë.
Udhëheqësi turk foli disa ditë pas takimit të tij të parë me Presidentin e SHBA Joseph Biden që nga marrja e detyrës. Të dy e njohin njëri-tjetrin prej vitesh dhe ata u takuan gjatë samitit të NATO-s në Bruksel.
Në një fjalim të transmetuar në televizion, Erdogan tha: “Ne ramë dakord që nuk ka çështje që nuk mund ta kapërcejmë dhe se, përkundrazi, fushat e bashkëpunimit janë më të mëdha dhe më fitimprurëse”.
Aleatët për një kohë të gjatë kanë një listë të gjatë të mosmarrëveshjeve, duke përfshirë mbështetjen e SHBA për luftëtarët kurdë në Siri dhe blerjen nga Turqia të sistemit mbrojtës rus S-400, i cili zemëroi Uashingtonin dhe dëboi Ankaranë nga programi i saj për të prodhuar avionët luftarakë më të fundit amerikanë F-35, dhe çoi në sanksione për zyrtarë të lartë të industrisë turke të mbrojtjes dhe një ndalim të licencave të eksportit ushtarak.
Uashingtoni thotë se sistemi rus paraqet një kërcënim për sigurinë e NATO-s dhe këmbëngul se sanksionet nuk mund të hiqen derisa Turqia të heqë qafe sistemin 2.5 miliard dollarë.
Ankaraja pretendon se luftëtarët kurdë në Siri janë vetëm një vazhdim i dekadave të kryengritjes së armatosur kurde në Turqi.
Erdogan e përshkroi bisedën e tij me Biden si gjithëpërfshirëse dhe produktive dhe tha se ata kishin rënë dakord të takoheshin përsëri.
“Ne besojmë se kemi hapur dyert për një epokë të re me Shtetet e Bashkuara mbi një bazë pozitive dhe konstruktive”, tha presidenti turk.
