Bota Francë/ Besimtarët që shkaktuan padashje përhapjen më të madhe në qytetin epiqendër...

Francë/ Besimtarët që shkaktuan padashje përhapjen më të madhe në qytetin epiqendër të virusit

Me qindra besimtarë të krishterë udhëtuan nga e gjithë bota dhe u mblodhën më 18 shkurt në Mulhouse, një qytet me 100 mijë banorë, në kufi me Zvicrën dhe Gjermaninë.

Besimtarët ishin me “Kishën e Krishterë me Dyer të Hapura”, dhe ky takim i përvitshëm është festa më e madhe për organizatën e tyre.

Por këtë herë, dikush nga të pranishmit ishte i infektuar me koronavirus, dhe shumë shpejt u krijua grupi më i madh në Francë i të infektuarve në një vend të vetëm.

Franca është vendi i tretë më i prekur në Europë, dhe nga më të prekurit në botë. Deri tani janë regjistruar mbi 2500 të vdekur.

Disa nga besimtarët e kësaj kishe e kanë kaluar virusin deri në Burkina Faso, në Afrikën perëndimore, si dhe në ishullin mesdhetar të Korsikës, në Guijana të Amerikës Latine, në Zvicër, në një central bërthamor të Francës dhe në fabrikën e një prodhuesi të madh makinash.

Edhe në Korenë e Jugut, mbledhjet fetare kanë qenë një nga shkaktaret e përhapjes më të madhe të virusit. Një kishë në vendin aziatik ka krijuar infektimin e 5000 personave.

Kur zyrtarët e shëndetësisë nisën të marrin masa, sëmundja kishte nisur të vepronte me planin e vet, dhe ishte përtej mundësive të tyre për ta ndaluar.