E ndonëse mandatin e dytë qeverisës e fitoi më shumicë votash, i vetëm me 74 vende në Parlament, Edi Rama e përshkroi edhe më të vështirë se i pari, ku për 4 vite u detyrua të bashkëqeverisë me LSI.
“Ky do të jetë mandati më i vështirë….”, u shpreh Rama si për të treguar se premtimet e fushatës nuk do të mbeten vetëm të tilla deri në 2021, duke shtuar se tiparet dalluese të qeverisë së re i ka gati.
Dhe për të dalluar qeverinë e re, Rama deklaroi sot se qeveria do të ndërmarrë një pastrim të administratës.
Shefi i qeverisë tha se do të shkrijë të ashtuquajturën “policinë gri” që në mbledhjen e para të qeverisë së re.
“Do bëjmë largime në bllok drejtuesish, drejtorësh apo shkrirje drejtorish. E ashtuquajtura “Policia gri” do të shkrihet që në mbledhjen e parë të qeverisë”, theksoi Kryeministri Rama.
Me termin “policia gri”, Kryeministri Rama iu referua policisë pyjore e inspektorateve të ndryshme që janë në varësi të Ministrive të ndryshme.
Sipas Ramës, këto inspektorate nuk kryejnë asnjë funksion dhe përdoren për të vendosur gjoba.
Shumica e këtyre inspektorateve drejtohen nga njerëzit e LSI dhe pikërisht për këtë arsye Rama përdori termin “Policia gri” që vendos gjoba.
E në kuadër të reformave reformuese, shefi i qeverisë deklaroi se shumë drejtorë të këtyre inspektorateve e drejtorive që do të shkrihen, do të largohen sa më parë nga detyra.
Ishte Niko Peleshi ai që prezantoi sot në Asamblenë e Partisë Socialiste raportin për ristrukturimin e institucioneve.
Sipas raportit të bërë publik nga Peleshi, propozohet që Drejtoria e Doganave dhe Drejtoria e Tatimeve në varësi të Ministrisë së Financave, të shkrihen së bashku.
Gjithashtu, në Ministrinë e Brendshme propozohet që të ngrihet Agjencia e Mbrojtjes Civile.
Po kështu, në Ministrinë e Arsimit është propozuar ngritja e Agjencisë së Sigurisë së Arsimit Parauniversitar.
Sipas propozimeve të Asamblesë së PS, parashikohet që nga ristrukturimet të preket edhe Ministria e Shëndetësisë.
Peleshi propozoi gjithashtu që të ketë 4 drejtori të arsimit nga 13 që janë aktualisht, si dhe enti i banesave sociale t’i kalojë Bashkive si kompetencë.
Drejtoritë që shkrihen
DREJTORITE QE SHKRIHEN TEK DISA PREJ MINISTRIVE
– Tek Ministria e Bujqësisë shkrihen drejtoritë e Bujqësisë
-Tek Ministria e Financave, Drejtoria e Tatimeve shkrihet me atë të Doganave në Agjensinë Kombëtare të të Ardhurave
-Tek Ministria e Shëndetësisë shkrihen 11 drejtori dhe autoritete rajonale shëndetësore në 4 agjensi të përkujdesit rajonal
Tek Ministria e Brendshme, Drejtoritë e Rezervave Materiale dhe Emergjencat Civile shkrihen në Agjensisë e Mbrojtjes Civile
– Tek Ministria e Mirëqënies Sociale shkrihen 12 Drejtori të Shërbimit Social Shëndetësor në 4 drejtori për 4 rajone
Tek Ministria e Arsimit shkrihet Instituti i Zhvillimit të Arsimit dhe Inspektoriati i Arsimit për të krijuar Agjensinë e Sigurimit të Cilësisë të Arsimit Parauniversitar.
Shkrihen 13 drejtori të Arsimit në 4 drejtori të arsimit parauniversitar.
– Tek Ministria e Ekonomisë shkrihet Drejtoria e Akreditimit me Drejtorinë e Standardizimit. Krijohen Agjensia e Akreditimit dhe Standardizimit
Tek Ministria e Zhvillimit Urban shkrihet Enti i Banesave, krijohet Fondi i Strehimit
ALUIZNI integrohet në Ndërmarrjen e Hipotekimit
– Tek Ministria e Mjedisit, Agjensia Kombëtare e Mjedisit bashkohet me Agjensinë për Zonat e Mbrojtura.
