Vijon të jetë kaotike situata e krijuar në aeroportin ndërkombëtar të Rinasit, pas grevës së kontrollorëve të trafikut ajror, që nisi një ditë më parë.
Dhjetëra pasagjerë, që vijojnë të qëndrojnë në ambientet e aeroportit, janë në pritje të fluturimit të tyre dhe bëjnë me dije se nuk kanë asnjë informacion nga autoritetet përgjegjëse se kur do të nisen për në destinacionin e tyre.
Ata shprehen të indinjuar, duke theksuar se kanë prerë biletën dhe u është komunikuar se fluturimi i tyre është shtyrë.
Shumica prej tyre kanë si destinacion Italinë, linja Tiranë-Bergamo, por ka edhe të tjerë që ishin nisur për në shtetin gjerman. Në total gjatë kësaj të enjteje ishin planifikuar 19 fluturime, ku dy prej tyre janë anuluar.
“Që në orën 4 të mëngjesit kemi ardhur këtu. Asnjë përgjigje nuk kanë dhënë. Fare!”, shprehet një qytetar i cili pret të udhëtojë drejt Gjermanisë.
Ata kanë shprehur shqetësimin se po u skadon edhe tamponi i cili është i vlefshëm vetëm për 48 orë, duke përmendur edhe koston e lartë të kryerjes së tij.
“Kemi ardhur që dje, na kthyen. Se çfarë do bëjmë nuk e dimë. As sqarim as asgjë. Ne sot duhet të ikim se jemi në punë, kemi edhe ne problemet tona. Kemi bërë tamponet, sot skadojnë. Çfarë të bëjmë tani, të bëjmë tampone të tjera? Edhe kushtojnë 170 mijë lek 2 tampone”, theksoi një tjetër udhëtare.
Ndërkohë, ushtria dhe forcat e policisë kanë marrë nën ruajtje kullën e kontrollit të trafikut ajror, Albcontrol, duke e konsideruar objekt të një rëndësie të veçantë.
