Bota Koronavirusi, 7 të vdekur në Itali, 229 raste të konfirmuara

Koronavirusi, 7 të vdekur në Itali, 229 raste të konfirmuara

Shkon në 7 numri i viktimave nga koronavirusi në Itali.

Rasti i fundit është ai i një gruaje 62-vjeçare nga Ada, një qytezë në Lombardi. Sikurse pjesa dërrmuese e rasteve që kanë përfunduar me vdekje, edhe gruaja kishte patologji të tjera të rënda.

Shefi i Mbrojtjes Civile, Angelo Borreli, tha se deri tani janë 229 rastet e konfirmuara me persona të infektuar, ku përveç viktimave, një person është larguar nga spitali pasi është shëruar.

Harta e të prekurve shtrihet në 5 rajone. Krahas Lombardisë e Venetos, te infektuar ka edhe ne Piemonte, Emilia Romanja dhe Lacio.

Autoritetet kanë marrë masa drastike në përpjekje për të izoluar virusin. Në 10 qytezat e vendosura në karantinë, ku janë shfaqur edhe rastet e para të të prekurve, policia nuk lejon hyrjet dhe daljet. Këto pamje janë xhiruar në Kastelpusterlengo, pranë Milanos. Shkollat, universitetet dhe institucionet publike janë mbyllur thuajse në të gjitha qytetet e mëdha.

Të përfshirë nga paniku e për të shmangur sa më shumë daljet nga banesat, banorët po furnizohen masivisht me ushqime, duke krijuar radhë të gjata jashtë supermarketeve. Në disa supermarkete ka mungesë ushqimesh për shkak të blerjeve të jashtëzakonshme. Në farmaci mungojnë maskat. Nëpër qytet lëvizjet janë të pakta.

Teatri i famshëm i operës, La Scala, ka anuluar të gjitha shfaqjet për një periudhë të pacaktuar. Karnavalet e Venecias nuk do të zhvillohen.

Masat e ashpra kanë prekur edhe futbollin. Nga 7 ndeshje të planifikuara janë zhvilluar vetëm 2, ndërsa Federata Italiane e Futbollit i ka kërkuar autorizim nga qeveria që ndeshjet të luhen pa tifozë.

Si dëshmi të situatës, televizionet më të mëdha italiane i shfaqën emisionet pa praninë e publikut. Organizata Botërore e Shëndetësisë do të dërgojë të martën një ekip mbikëqyrësish në terren. Disa vende europiane po ushtrojnë kontrolle të rrepta për të gjithë personat që shkojnë nga Italia.

Ne aeroportet dhe pikat e kalimit kufitar në Rumani po u nënshtrohen analizave, të gjithë emigrantët rumunë që kthehen nga Italia. Kontrolle nëpër autobusët, trenat dhe avionët që vijnë nga Italia janë ushtruar edhe në Austri e Francë.