Bota Masakra në Gjermani, Merkel: Racizmi është helm që gjendet në shoqërinë tonë

Masakra në Gjermani, Merkel: Racizmi është helm që gjendet në shoqërinë tonë

Kancelarja gjermane, Angela Merkel deklaroi sot se racizmi është një helm dhe ky helm gjendet në shoqërinë tonë.

Deklarata e sipërcituar bëhet pas incidentit tragjik në qytetin gjerman, Hanau, ku një ekstremist i djathtë vrau nëntë persona, përpara se të vetëvritej.

“Po bëhet gjithçka për të qartësuar deri në detajin e fundit, rrjedhën e këtyre vrasje vetë tmerrshme. Ka shumë tregues që autori të ketë vepruar si ekstremist i së djathtës, për motive raciste dhe me urrejtje ndaj personave të origjinave të tjera, besimeve fetare apo pamjes së jashtme. Racizmi është një helm. Urrejtja është një helm dhe ky helm ekziston në shoqërinë tonë, e cila duhet të fajësohet aktualisht për shumë krime”, deklaroi kancelarja gjermane.

Zëdhënësi i qeverisë gjermane, Steffen Seibert tha se kancelarja Merkel ka anuluar programin në qytetin Halle për shkak të sulmit në Hanau.

Seibert gjithashtu njoftoi se Merkel informohet për çdo zhvillim në Hanau.

Ndërkohë, ministri i Jashtëm gjerman, Heiko Maas, në deklaratën e tij tha se “ngjarja e tmerrshme në Hanau na la të gjithëve në dhimbje. Mendimet tona janë me ata që humbën jetën, familjet dhe të afërmit e tyre. Shpresoj që sa më shpejt të shërohen të plagosurit”.

Në një sulm ndaj dy lokaleve në Hanau humbën jetën 9 persona, në mesin e të cilëve edhe qytetarë turq. Në sulm u plagosën 5 të tjerë.

Ekstremist i djathtë që vrau nëntë persona

Në aksionin e zhvilluar nga ekipet e sigurisë, terroristi i së djathtës ekstreme Tobias R. është gjetur i vdekur në shtëpinë e tij. Ai pas tij ka lënë edhe një video mesazh me një letër.

“Disa kombe duhet të shkatërrohen dhe të mos u jepen pasaportat gjermane”, thuhet në letrën e shkruar nga autori.