Aktualitet Meta dënon aktet kriminale të ditëve të fundit

Meta dënon aktet kriminale të ditëve të fundit

Presidenti Ilir Meta ka reaguar në rrjetet sociale pas ngjarjeve kriminale të ditëve të fundit, ku në Fier u vra biznesmeni Demir Backa dhe në Nikël u dhunua dhe u torturua, biznesmeni Nazmi Çangu.

Meta ka dënuar me forcë aktet kriminale dhe thotë se kanë tronditur thellë opinionin publik dhe përbëjnë kërcënim serioz për rendin dhe sigurinë e qytetarëve.

Kreu i shtetit i ka lëshuar një thirrje autoriteteve ligjzbatuese që të bashkëpunojnë për arrestimin e menjëhershëm të autorëve me rrezikshmëri të lartë.

“Dënoj me forcë aktet tepër të rënda kriminale të ditëve të fundit, vrasjen e biznesmenit Backa në qendër të Fierit, si dhe grabitjen dhe torturimin e biznesmenit Çangu në Nikël të Krujës. Këto ngjarje, që kanë tronditur thellë opinionin publik, përbëjnë një kërcënim serioz për rendin, sigurinë e jetës dhe pronës së qytetarëve, por edhe për zhvillimet ekonomike dhe sociale të vendit. I bëj thirrje Policisë së Shtetit, Prokurorisë, Shërbimit Informativ të Shtetit, si dhe të gjithë institucioneve të tjera ligjzbatuese në vend, të forcojnë bashkëpunimin për arrestimin e menjëhershëm të autorëve me rrezikshmëri të lartë dhe vënien e tyre para drejtësisë, por edhe për të marrë të gjitha masat efektive për të parandaluar ngjarje të tilla të rënda dhe tronditëse kriminale”, tha Meta.