Ekonomi Miliona njerëz u bënë milionerë gjatë pandemisë Covid

Miliona njerëz u bënë milionerë gjatë pandemisë Covid

Më shumë se pesë milionë njerëz u bënë milionerë në të gjithë botën në vitin 2020, pavarësisht dëmit ekonomik nga pandemia e Covid-19.

Ndërsa shumë njerëz të varfër u bënë edhe më të varfër, numri i milionerëve u rrit me 5.2 milionë në 56.1 milionë në mbarë botën, zbuloi kërkimi i Credit Suisse.

Në vitin 2020 më shumë se 1% e të rriturve në të gjithë botën ishin milionerë për herë të parë.

Rikuperimi i tregjeve të aksioneve dhe rritja e çmimeve të shtëpive ndihmuan në rritjen e pasurisë së tyre.

Krijimi i pasurisë duket se ishte “shkëputur plotësisht” nga problemet ekonomike të pandemisë, thanë studiuesit.

Anthony Shorrocks, ekonomist dhe autor i Raportit Global të Pasurisë, tha se pandemia kishte një ndikim akut afatshkurtër në tregjet globale, por shtoi se kjo u përmbys kryesisht nga fundi i qershorit 2020.

“Pasuria globale jo vetëm që qëndroi përballë një trazire të tillë, por u rrit me shpejtësi në gjysmën e dytë të vitit”, tha ai.

Pasuria totale globale u rrit me 7.4%, thuhet në raport.

Që nga fillimi i shekullit 21, numri i njerëzve me pasuri midis 10 000 dollarë dhe 100 000 dollarë u trefishua; nga 507 milionë në vitin 2000 në 1.7 miliardë në mes të 2020-s.

Sipas raportit, rritja pasqyronte “prosperitetin në rritje të ekonomive në zhvillim, veçanërisht të Kinës, dhe zgjerimin e klasës së mesme në botën në zhvillim”.

Zyrtarja kryesore e investimeve në Credit Suisse, Nannette Hechler-Fayd’herbe tha: “Nuk duhen mohuar veprimet e ndërmarra nga qeveritë dhe bankat qendrore për të organizuar programe masive të transferimit të të ardhurave për të mbështetur individët dhe bizneset më të prekura nga pandemia, dhe duke ulur normat e interesit, kanë shmangur me sukses një krizë globale në shkallë të plotë”.

Ajo shtoi se: “Ulja e normave të interesit nga bankat qendrore ka pasur ndoshta ndikimin më të madh.

“Është një arsye kryesore pse çmimet e aksioneve dhe çmimet e shtëpive kanë lulëzuar dhe këto përkthehen drejtpërdrejt në vlerësimet tona të pasurisë së familjes”. Por ajo shtoi se këto ndërhyrje kanë ardhur me një kosto të madhe.

“Borxhi publik në lidhje me PBB-në është rritur në të gjithë botën me 20 pikë përqindje ose më shumë në shumë vende.

“Pagesat nga sektori publik për familjet kanë bërë që të ardhurat e disponueshme të familjeve të jenë relativisht të qëndrueshme dhe madje janë rritur në disa vende”.