Ndërkohë që janë intensifikuar përpjekjet diplomatike për shmangien e konfliktit në Ukrainë, ushtria ruse demonstron forcë. Lëvizja e re nga SHBA, lejon vendet baltike të dërgojnë armë në Ukrainë
Në kulmin e tensionit lidhur me Ukrainën, lidhur edhe me shqetësimin e Perëndimit nga ndërhyrja e ushtrisë ruse në vendin fqinj, Rusia ka njoftuar për një manovër ushtarake në shkallë të gjerë në Atlantik, Arktik, Paqësor dhe në Mesdhe. Në stërvitjen e planifikuar për në janar dhe shkurt janë përfshirë gjithsej më shumë se 140 anije, mbi 60 aeroplanë dhe 1000 pajisje të tjera ushtarake, njoftoi Ministria ruse e Mbrojtjes në Moskë, sipas të dhënave të agjencive ruse të lajmeve. Rreth 10.000 ushtarë do të marrin pjesë në këtë manovër.
Ministria ruse e Mbrojtjes shpjegoi, se qëllimi kryesor i stërvitjes së planifikuar është “mbrojtja e interesave kombëtare ruse në oqeane dhe për t’u bërë ballë kërcënimeve ndaj Rusisë prej oqeaneve”.
SHBA lejon vendet baltike të dërgojnë armë në Ukrainë
SHBA-ja u ka dhënë leje Letonisë, Lituanisë dhe Estonisë që të dërgojnë armët e tyre të prodhimit amerikan në Ukrainë me qëllim që të mbështesin këtë vend.
Një lëvizje e re ka ardhur nga administrata amerikane pas grumbullimit ushtarak të Rusisë në rajonet afër kufirit ukrainas.
Në lajmin e gazetës amerikane “Wall Street Journal” të bazuar në një zyrtar, pretendohet se SHBA-ja u ka dhënë leje anëtarëve të rajonit baltik të NATO-s, Letonisë, Lituanisë dhe Estonisë që të dërgojnë raketat antitank ”Javelin” dhe antiajrore ”Stinger” për të mbështetur ushtrinë ukrainase.
Një zyrtar që ka folur për gazetën ka thënë se administrata e presidentit amerikan Joe Biden ka njoftuar Kongresin lidhur me miratimin e shitjes së helikopterit transportues ”Mi-17” për Ukrainën.
Ndërkohë Departamenti amerikan i Mbrojtjes dhe Departamenti i Shtetit janë shmangur të japin deklarata për këto dy çështje.
Tensionet
Teksa tensionet në rajon janë përshkallëzuar, sekretari i Shtetit, Antony Blinken vizitoi Kievin dhe përsëriti mbështetjen për Ukrainën.
SHBA-ja paralajmëron se do të vendosë sanksione të rënda ndaj Rusisë nëse pushton Ukrainën.
Blinken dhe ministri i Jashtëm rus, Sergey Lavrov do të takohen sot në Gjenevë për të biseduar për sigurinë e rajonit dhe kryesisht tensionet në kufirin e Ukrainës.
