Aktualitet Në kërkim nga Interpol, arrestohet në Brazil 45-vjeçari shqiptar (Video)

Në kërkim nga Interpol, arrestohet në Brazil 45-vjeçari shqiptar (Video)

Një shqiptar i shpallur në kërkim ndërkombëtar është vënë në pranga në Brazil. Mediat vendase bëjnë me dije se në pranga ka rënë Shaqir Nikolli, i cili ka qenë në listën e të kërkuarve nga Interpol.

Mësohet se Nikolli është arrestuar pak ditë më parë në Brazil, në Sao Paolo. Ai akuzohet për pjesëmarrje në një organizatë kriminale e cila merrej me trafikun ndërkombëtar të drogës.

Nikolli, tashmë do të vuajë disa dënime pasi ka qenë në kërkim nga autoritetet në Francë ku rezulton i dënuar me 10 vite, por dhe në Maqedoninë e Veriut.

45-vjeçari është një emër i njohur për drejtësinë shqiptare, pasi akuzohet se në vitin 1996 ka marrë peng një autobus dhe ka kryer dy vrasje.

Nikolli lidhur me këtë ngjarje është arrestuar në vitin 2011 në Vjenë, por ka mundur që të dalë nga burgu dhe ka vijuar jetën në Brazil.