Kosova Pacolli: Po më pengojnë të kthehem në Kosovë

Pacolli: Po më pengojnë të kthehem në Kosovë

Kryetari i AKR-së në Kosovë, Behgjet Pacolli, ka bërë të ditur se nuk po lejohet të futet në Kosovë pas dy muajsh karantinim në Zvicër.

Përmes një postimi në rrjetet sociale ish-zv/kryeministri i Kosovës tha se i është anuluar leja e uljes në aeroportin e Prishtinës për avionin e tij.

Pacolli thotë se kjo gjë është privim i të drejtës së tij për të lëvizur. Ai thotë se ia ka dëshmuar me dokumente autoriteteve gjendjen shëndetësore, megjithatë sërish pengohet për të ardhur në Kosovë.

“Është tronditëse kjo që po ndodhë me mua! Pas dy muajsh karantinimi së bashku me familjen time në Zvicër, nën asistencën shëndetësore, diçka që ua dëshmova me dokumente, më pengojnë të vij në Kosovë! Jam unë që rrezikoj duke ardhur në vendin tim nga Zvicra, një sistem kujdesi shëndetësor i përparuar, por dua të respektoj votën e qytetarit për mua”!

Fajtor për këtë fakt, ai bën qeveritarët e Kosovës të cilëve u shtron disa pyetje.

“Ju qeveritarë të Kosovës, kështu do bëni dhe me diplomatë zviceranë a perëndimorë që mund të vijnë në Kosovë? Do t’i karantinoni? Kush e bën këtë? Po e bën një qeveri te cilën unë e kam votuar! Për më shumë nuk kam votuar as mocionin për rrëzimin e saj”!

Sipas Pacollit, qeveria po i pengon zhvillimin e veprimtarisë parlamentare në shërbim të atdheut. Më tej, ai shton se ky akt është në kundërshtim me ligjet ndërkombëtare.

“Kjo qeveri sot në mënyrë primitive, diktatoriale, më privon të kthehem në vendin tim! Më pengon të zhvilloj veprimtarinë time parlamentare në shërbim të Atdheut tim! Akti ndaj meje, në kundërshtim me gjithë ligjet ndërkombëtare, madje dhe me vendimin e fundit të Gjykatës Kushtetuese, nuk është akt force, por akt dobësie! Nuk është akt trimërie, por disfate! Nuk është qeveri e fortë, një qeveri që kapet pas pushtetit kësisoj dhe pengon veprimtarinë e parlamentit me çdo mjet, por qeveri e dobët! Kush jeni ju që paragjykoni veprimtarinë time parlamentare? Kush jeni ju që paragjykoni votën time? Po nëse unë do ta shpallja publikisht se do të votoja pro jush – a do të më pengonit? Jo, nuk e besoj! Ju kam votuar duke besuar tek rotacioni, tek energjia e re e votuesve tuaj, tek nevoja për ndryshim, por kjo që po ndodhë ndaj meje, është zhgënjyese! Kjo është përgjigjja ndaj sjelljeve të mia ndaj jush”.