Kryesore Precedenti në Spanjë: Kur Madridi burgosi kontrollorët e trafikut ajror

Precedenti në Spanjë: Kur Madridi burgosi kontrollorët e trafikut ajror

Në vitin 2010 trafiku ajror në Spanjë u paralizua tërësisht nga greva e përgjithshme e kontrollorëve të trafikut ajror, ngjashëm me bllokimin e fluturimeve sot në Shqipëri.

U desh ndërhyrja e ushtrisë për të marrë nën kontroll hapësirën ajrore të vendit pasi kontrollorët e trafikut ajror braktisën në grup detyrën duke bllokuar nëpër terminale mbi 330 mijë udhëtarë dhe detyruar qeverinë të mbyllë aeroportin kryesor të vendit, atë të Madrdit.

Gjashtë orë pasi vendi u zhyt në kaos, Ministria e Mbrojtjes mori kontrollin e hapësirës ajrore. Ushtria mori atë kohë të gjitha vendimet në lidhje me organizimin, planifikimin dhe mbikëqyrjen.

Qeveria e atëhershme spanjolle e kryeministrit Jose Luis Rodriguez Zapateroi kërcënoi kontrollorët e trafikut ajror se nëse nuk ktheheshin në vendet e punës dhe rikthenin normalitetin e fluturimeve, do të shpallej gjendja e jashtëzakonshme dhe kontrollorët do të detyroheshin me forcë. Në rast të mosparaqitjes në punës kontrollorët e trafikut ajror do të përballeshin me ndëshkime të rënda penale e rrezikonin burgun.

Kontrollorët spanjollë të trafikut ajror e braktisën punën gjatë krizës së vitit 2010 pas mosmarrëveshjeve me qeverinë Zapatero për kushtet e punës dhe pas miratimit të një pakete me masa shtrënguese, që përfshinte edhe privatizimin e aeroporteve dhe kalimin e menaxhimit në duart e sektorit privat.

Kjo situatë  bëri që qeveria e kryeministrit José Luis Rodríguez Zapatero të shpallte një gjendje alarmi, për herë të parë në Spanjë, për 43 ditë.

Dënimet

Gjykata dënoi 131 kontrollorë të trafikut ajror në aeroportet e Madridit ”Barajas” dhe ”Torrejón”, si edhe menaxherin e aeroportit ”Enaire’, me akuzën për grevë të fshehtë dhe me gjoba prej 15 000 dhe 31 500 eurosh për krimin e braktisjes së shërbimit publik.

Për më tepër, gjykata i dënoi të akuzuarit të paguanin edhe shumën prej 13 076 981 eurosh për palët e dëmtuara, bashkërisht dhe veçmas, së bashku me kompaninë publike ”Enaire”, si përgjegjësi plotësuese civile.

Gjykata Penale e Madridit mori në dhjetor 2020 vendimin përfundimtar në çështjen lidhur me grevën e dhjetorit 2010 të kontrollorëve ajrorë, që krijoi kaosin më të madh të këtij lloj  në Spanjë deri më tani.