Pasi ka lënë sallën e Kuvendit, kryeministri Edi Rama është nisur drejt Italisë.
Ai do të jetë i ftuar në studion “Porta a Porta” të Bruno Vespës.
“Në Itali 24 orë për të mbrojtur Shqipërinë, pas cënimit të rëndë ndërkombëtar nga shfaqja e turpshme të dhunës partiake të 16 shkurtit e në vazhdim, që kërcënon investitorët e planet e tyre dhe turizmin që punëson e ushqen dhjetëra mijëra njerëz”, shkruan Rama në Twitter.
Rama ka zgjedhur debatin e famshëm “Porta a Porta” për të sqaruar italianët se “nuk bëhet fjalë për një protestë popullore, por vetëvrasje të opozitës”.
Mediat italiane i kanë kushtuar shumë vëmendje zhvillimeve të fundit në Shqipëri. RAI veçanërisht dhe të gjithë shërbimet e tij kryesore, janë fokusuar në protestat e shkurtit, dhe kanë bërë edhe investigime për trafikun e drogës.
Bruno Vespa, 74 vjeç është gazetar i famshëm televiziv. Ai themeloi emisionin Porta a Porta, me të ftuar të rëndësishëm të jetës politike në Itali dhe nga vende të tjera.
Emisioni i tij është transmetuar pa ndërprerje në kanalet e Rai që nga viti 1996.
