Ndëshkime shembullore ka premtuar kryeministri Edi Rama për të gjithë ata që do të guxojnë të prekin qoftë edhe një fije floku të mjekëve për shkak të detyrës.
Kreu i qeverisë, në një takim me drejtues shërbimesh mjekësore, foli për ashpërsim të Kodit Penal për dhunën ndaj mjekëve, ngjashëm me hapat që do të hidhen për ndalimin e dhunës në sport.
“Goditja për shkak të detyrës do të hyjë në një kornizë të re pamundësie për diskrecion nga ana e prokurorëve dhe gjykatësve. Pamundësie për të thënë jo ishte goditje, jo nuk ishte goditje, jo i ra me mendje, jo i ra pa mendje.”
Rama tha se Kodi Penal do të ndryshohet edhe lidhur me mjekimin e pakujdesshëm dhe neglizhencës. “Ndryshimi i Kodit Penal lidhur me përcaktimin e mjekimit të pakujdesshëm, neglizhencës në mjekim, bazuar në praktikat ndërkombëtare, jo në emocionet mediatike, duke u krijuar mjekëve lehtësi dhe duke u dhënë garanci në ushtrimin e profesionit është një domosdoshmëri.”
Kjo po ashtu, tha Rama, do të sigurojë kushte “për t’iu dhënë ndëshkime shembullore atyre që prekin një fije floku të kujt shërben sot.”
