Bota Rrëzohet qeveria në Bullgari: Paqartësi se çfarë do të ndodhë me veton...

Rrëzohet qeveria në Bullgari: Paqartësi se çfarë do të ndodhë me veton ndaj Maqedonisë së Veriut

Qeveria e kryeministrit bullgar Kiril Petkov është rrëzuar këtë të mërkurë pasi nuk mori votëbesimin e parlamentit për politikat fiskale dhe ekonomike, duke i hapur me gjasë kështu rrugën zgjedhjeve të parakohshme.

Partitë opozitare dhe ish-aleati në qeverisje ITN, rrëzuan koalicionin qeveritar që erdhi në pushtet në Dhjetor, me 123 vota pro dhe 116 kundër.

Ky është votimi i parë i mosbesimit në historinë demokratike të Bullgarisë.

Qeveria e Petkovit erdhi në pushtet me zotimin për të luftuar me vendosmëri korrupsionin, për të hequr nga detyra prokurorin e Përgjithshëm, Ivan Geshev dhe kreun e Komisionit Anti-korrupsion, Sotir Tsatsarov. Po ashtu u zotua se do të forcojë fuqitë e komisionit. Dorëheqja e Tsatsarovit erdhi e para.

Por vendimi i ditës së sotme e bën akoma më të paqartë qëndrimin e Bullgarisë në samitin e Këshillit Europian për çështjen e integrimit europian. Kreu i opozitës bullgare njoftoi se është dakord për heqjen e vetos ndaj Maqedonisë së Veriut.

Ndërkohë, Komisioni i Politikës së Jashtme i parlamentit të Bullgarisë, pritet të shqyrtojë edhe propozimin francez për zgjidhjen e çështjeve të hapura me Maqedoninë e Veriut.

Mediat ndërkombëtare kanë njoftuar se së fundmi në Bullgari është arritur një kompromis mbi këtë propozim. Heqja e vetos e Bullgarisë i hap rrugë çeljes së negociatave për Maqedoninë e Veriut dhe Shqipërinë.