Londra dhe Brukseli shprehin optimizëm për një ujdi të re për Brexit. Të mbledhur në Luksemburg për samitin e Bashkimit Europian, përfaqësuesit e Unionit dhe Britanisë së Madhe, theksojnë se do të punojnë deri në minutën e fundit për të arritur një divorc me marrëveshje.
Në javën vendimtare për Brexit, palët pranojnë se diskutimet janë vështirësuar nga çështja e kufirit Irlandez.
“Do të punojmë për një Brexit të rregullt deri në minutën e fundit. Por ne jemi të përgatitur për faktin që Britania e Madhe me shumë gjasë do të shfaqet si konkurrent i BE-së, pra do të sfidojë Unionin në aftësinë e tij për të konkurruar dhe në përgjegjësitë gjeopolitike”, deklaroi kancelarja gjermane Angela Merkel.
“Arritja e një ujdie është akoma e mundur. Por natyrisht, marrëveshja duhet të funksionojë për të gjithë. Kjo është koha e duhur për t’i kthyer qëllimet e mira në dokument ligjor”, shtoi Michel Barnier, kryenegociatori për Brexit i BE-së.
“Bisedimet po vazhdojnë. Duhet t’u japim atyre hapësirë, por negociata të detajuara janë në vazhdim dhe një ujdi është akoma e mundur”, tha nga ana e tij Stephen Barclay, ministri i Britanisë së Madhe për Brexit.
Vendet anëtare shprehen se Bashkimi Europian është i përgatitur për të gjitha skenarët e mundshme, ndërsa nuk përjashtohet dhe mundësia e shtyrjes së largimit zyrtar të Britanisë. Megjithatë qeveria e Londrës e kundërshton me forcë një gjë të tillë dhe ka premtuar se Brexit do të ndodhë më 31 tetor, me ose pa ujdi.
