Aktualitet Shkatërrimi i katër bandave kriminale, shkon në 58 numri i të arrestuarve

Shkatërrimi i katër bandave kriminale, shkon në 58 numri i të arrestuarve

Ka shkuar në 58 numri i personave të arrestuar, si rezultat i operacionit “LIMIT”. Ditën e sotme u vu në prangat e policisë një nga tetë personat e shpallur në kërkim. I arrestuari është një 65-vjeçar nga Korça, me inicialet H.S, i cili akuzohet për veprat penale “Trafikimi i narkotikëve”, “Grup i strukturuar kriminal” dhe “Kryerja e veprave penale nga grupi i strukturuar kriminal”.

Si pasojë e këtij operacioni, policia njoftoi dje se u shkatërruan katër grupe kriminale në fushën e narkotikëve. Në një deklaratë për mediat, kreu i Policisë së Shtetit, Ardi Veliu, tha dje se operacioni u realizua në bashkëpunim edhe me autoritetet greke, pasi anëtarët e grupit kriminal e kishin shtrirë aktivitetin edhe në këtë shtet.

Hetimet për këtë operacion kishin nisur që në vitin 2016 pas disa rasteve të trafikut të drogës në Greqi, ndërsa në shtetin grek janë arrestuar 34 persona të tjerë dhe janë sekuestruar 200 kg kanabis, 3.5 kg kanabis çokollatë dhe 1.3 kg kokainë. Ndërsa në vendin tonë u sekuestrua 120 kg kanabis, 4 kg kanabis çokollatë, 1.1 kg kokainë, bimë narkotike, 3800 fara kanabisi dhe u zbulua një laborator droge.

Njoftimi i Policisë së Shtetit

Vijon megaoperacioni policor i koduar “LIMIT”

Shkon në 58 numri i të ndaluarve dhe vijon puna për kapjen e 7 personave të tjerë të shpallur në kërkim.

Kapet dhe ndalohet një prej të kërkuarve, pjesëtar i një prej katër grupeve të strukturuara kriminale, të shkatërruara gjatë operacionit “LIMIT”.

Operacioni u finalizua pas një hetimi 3-vjeçar, për goditjen e veprimtarisë kriminale të këtyre grupeve që ushtronin veprimtarinë në fushën e narkotikëve dhe të trafiqeve të paligjshme.

Operacioni nga Policia e Shtetit, nën drejtimin e Prokurorisë së Krimeve të Rënda, në bashkëpunim me Policinë Greke dhe me koordinimin e SELEC-ut.

Në vijim të operacionit “LIMIT”, shërbimet e Policisë kapën dhe ndaluan shtetasin H. S., 65 vjeç, banues në Korçë, pasi Gjykata e Shkallës së Parë për Krimet e Rënda Tiranë, ka caktuar masën e sigurisë “Arrest në burg“, për veprat penale “Trafikimi i narkotikëve”, “Grup i strukturuar kriminal” dhe “Kryerja e veprave penale nga grupi i strukturuar kriminal”.

Gjatë operacionit në Shqipëri dhe Greqi u sekuestruan rreth 320 kg kanabis, 7.5 kg Kanabis në formë çokollate, 2.4 kg Kokainë, laboratorë për kultivim të bimëve narkotike, 3800 fara kanabis, fishekë luftarakë, si dhe janë asgjësuar parcela me bimë narkotike të kultivuara.

Gjatë periudhës së hetimit 2016 – 2019, është shkëmbyer në kohë reale informacion me partnerët tanë nëpërmjet SELEC-ut për aktivitetin kriminal të personave të përfshirë në këto grupe kriminale dhe si rezultat, nga autoritetet policore greke janë arrestuar 34 persona, të cilët ushtronin aktivitetin kriminal të trafikimit dhe shpërndarjes të narkotikëve.

Ndërsa gjatë operacionit “LIMIT” të zhvilluar në Shqipëri, u arrestuan 23 persona dhe 8 u shpallën në kërkim, njëri prej të cilëve u kap mëngjesin e sotëm nga Policia e Shtetit.

Operacioni vijon për kapjen e personave të tjerë të shpallur në kërkim.

Nën drejtimin e Prokurorisë së Krimeve të Rënda vijon puna për dokumentimin e plotë të aktivitetit kriminal të këtyre grupeve të strukturuara kriminale, me qëllim identifikimin dhe arrestimin e anëtarëve të tjerë të përfshirë.