Zuzana Čaputova, kandidatja që premtim kryesor gjatë fushatës zgjedhore e pati luftën kundër korrupsionit, fitoi në raundin e dytë të zgjedhjeve presidenciale në Sllovaki. Ajo është femra e parë që zgjidhet presidente.
Zuzana Čaputová nuk ka pothuajse aspak përvojë politike, por në raundin e dytë e mposhti diplomatin e profilit të lartë, Maros Sefcovic, i cili ishte kandidat i partisë që është aktualisht në pushtet në Sllovaki.
Zgjedhjet presidenciale në Sllovaki janë mbajtur vetëm një vit pas vrasjes së gazetarit investigativ Jan Kuciak, i cili hulumtonte lidhjet e politikanëve me krimin e organizuar.
Gazetari është vrarë me armë zjarri në shkurt të vitit 2018. Presidentja e re thotë se pikërisht kjo vrasje ka qenë një prej motiveve kryesore pse ka vendosur t’i futet garës presidenciale.
Avokatja bëhet presidente
Zuzana Čaputová është një avokate e njohur në Sllovaki. Ajo ka udhëhequr edhe procesin e groposjes ilegale të mbeturinave, i cili zgjati 14 vjet.
Presidentja e re e Sllovakisë është 45-vjeçare, nënë e dy fëmijëve dhe e divorcuar. Ajo është anëtare e partisë “Sllovakia Progresiste”, e cila nuk ka asnjë ulëse në parlament.
Në raundin e parë të zgjedhjeve, ajo i kishte fituar 40 për qind të votave, ndërsa kandidati tjetër, i cili është zëvendëspresident i Komisionit Evropian, vetëm 19 për qind.
