Në Suedi, lagjet e varfra në periferitë e Stokholmit janë prekur deri në tri herë më shumë nga koronavirusi i ri, sesa pjesa tjetër e kryeqytetit, sipas shifrave të autoritetet shëndetësore rajonale të botuara sot.
“Kjo reflekton shumë qartë imazhin e shëndetit publik dhe ndarjes në Stokholm. Atje ku njerëzit tashmë jetojnë në varfëri dhe ku shëndeti është më i keq sesa gjetkë, pandemia është duke goditur shumë”, tha Anna Starbrink, këshilltare rajonale e shëndetësisë, cituar nga e përditshmja “Dagens Nyheter”.
Rajoni i Stokholmit pretendon të ketë forcuar përpjekjet për informim në mesin e muajit mars në këto lagje, ku jetojnë shumica e njerëzve me prejardhje emigrantësh.
Në mbretërinë skandinave, ndryshe nga vendet e tjera të Europës, kufizimi i popullsisë nuk është i detyrueshëm për të frenuar epideminë.
Qeveria bën thirrje për një qytetari të mirë, duke kërkuar nga të gjithë që të marrin përgjegjësitë e tyre dhe të ndjekin rekomandimet e autoriteteve shëndetësore.
Ndër masat më të rrepta deri më tani ka qenë ndalimi i tubimeve të më shumë se 50 personave dhe vizitat në azilet e pleqve.
114 persona kanë humbur jetën në 24 orët e fundit duke e çuar totalin e të vdekurve në këtë vend në 591, një mesatare jo e vogël nëse merret parasysh se bëhet fjalë për një vend me vetëm 10.3 milionë banorë.
Suedia ka regjistruar deri tani 7 693 raste infektimi me COVID-19.
Megjithatë, numri i pacientëve konsiderohet të jetë shumë më i lartë, sepse jo të gjithë personat me simptoma janë testuar.
