Ngjarjet e shëmtuara në Partizani-Flamurtari shoqëruan gjithë fundjavën me polemika. Në momentin që Ribaj barazoi rezultatin, ekipi vlonjat po festonte me foton e zakonshme. Tifozët replikuan në distancë me fotografin Shkëlqim Rama dhe aq u desh që situata të kalonte në dhunë.
Pas kallëzimit të bërë nga Shkëlqim Rama, policia ka identifikuar personat që e sulmuan. Shërbimet e Komisariatit të Policisë Nr.2, identifikuan dhe proceduan penalisht në gjendje të lirë, shtetasit:
- Xh., 31 vjeç, banues në Tiranë
- Ll., 31 vjeç, banues në Tiranë
- B., 19 vjeç, banues në Tiranë
- H., 28 vjeç, banues në Tiranë
“Këta shtetas më datë 23 shkurt 2019, rreth orës 17:40, tek stadiumi “Selman Stërmasi”, gjatë zhvillimit të ndeshjes “Partizani-Flamurtari”, kanë hyrë në fushë dhe kanë goditur shtetasin Sh. R., 32 vjeç (fotograf i ekipit “Flamurtari”).
Materialet iu referuan Prokurorisë së Rrethit Gjyqësor Tiranë në ngarkim të shtetasve të lartpërmendur për veprat penale “Prishje e rendit dhe qetësisë publike”, “Mosbindje e urdhrit të punonjësit të rendit publik”, “Dëmtime të tjera me dashje e kryer në bashkëpunim”, parashikuar nga nenet 274, 242 dhe 90/25 të Kodit Penal“, deklaroi policia.
