Presidenti Donald Trump iu është rikthyer akuzave duke thënë se Volodymyr Zelensky dhe ish-presidenti Joe Biden kanë “lejuar” fillimin e luftës në Ukrainë.
Në një postim në Truth Social, Presidenti amerikan e përshkruan konfliktin si “luftë e Bidenit, jo e imja”.
Ai shton: “Presidenti Zelensky dhe Joe Biden i korruptuar bënë një punë absolutisht të tmerrshme duke lejuar që kjo luftë të fillojë.
Kishte shumë mënyra për ta parandaluar atë që të mos fillonte ndonjëherë”.
Trump gjithashtu pretendon se po të kishte mbetur në Shtëpinë e Bardhë pas mandatit të tij të parë, lufta nuk do të kishte filluar kurrë.
“Nëse zgjedhjet presidenciale të vitit 2020 nuk do të manipuloheshin dhe do të ishte, në shumë mënyra, ajo luftë e tmerrshme nuk do të kishte ndodhur kurrë”, thotë ai.
Kujtojmë se Trump publikoi këto deklarata një ditë pas sulmit me raketa balistike të Rusisë në qytetin ukrainas Sumy, për të cilin Volodymyr Zelensky thotë se vrau 34 njerëz.
Disa javë më parë, Trump e përshkroi Zelensky si një “diktator”, përpara se të tërhiqte komentin disa ditë më vonë.
Gjatë fushatës për zgjedhjet presidenciale të vitit të kaluar në SHBA, Trump tha vazhdimisht se lufta në Ukrainë nuk do të kishte ndodhur nëse ai do të kishte qenë në Shtëpinë e Bardhë.
Por pavarësisht pretendimeve të Trump, ishin forcat ruse të Vladimir Putin që nisën një pushtim në shkallë të plotë të Ukrainës në shkurt 2022.
