Aktualitet U kap nga policia spanjolle, kush është 33-vjeçari shqiptar që tentoi të...

U kap nga policia spanjolle, kush është 33-vjeçari shqiptar që tentoi të ‘hiqte qafe’ rivalët

Policia e Shtetit ka reaguar për arrestimin në Spanjë të një shqiptari që ishte shpallur në kërkim ndërkombëtar.

Bëhet e ditur se si rezultat i shkëmbimit të informacionit mes Policisë shqiptare dhe Policisë spanjolle, në kuadër të operacionit “Madrid“, policia spanjolle arrestoi me qëllim ekstradimin drejt Shqipërisë një 33-vjeçar shqiptar në kërkim ndërkombëtar.

I arrestuari është Hektor Ndoka, 33 vjeç, lindur në Lezhë, të cilit Gjykata e Rrethit Gjyqësor Lezhë, me vendimin e datës 16.12.2021, i ka caktuar masën e sigurisë “Arrest në burg”, për veprat penale “Pastrimi i produkteve të veprës penale ose veprimtarisë kriminale” dhe “Mbajtja pa leje dhe prodhimi i armëve, armëve shpërthyese dhe municionit luftarak”.

Ndoka ishte shpallur në kërkim ndërkombëtar në kuadër të operacionit policor të koduar “Mataro”, i zhvilluar në muajin dhjetor 2021, nga strukturat e DVP Lezhë.

Gjatë këtij operacioni u arrestuan në flagrancë 3 persona dhe u shpallën në kërkim 2 të tjerë.

Gjithashtu, gjatë operacionit janë sekuestruar: 2 mina me telekomandë me lëndë eksplozive C4, të përgatitura gati për shpërthim, 2 armë automatike me shënjestër optike, 2 kallashnikovë, 1 armë automatike model “Scorpions” me silenciator me dy krehra, 1 armë zjarri pistoletë model “Glock” me një krehër me 11 fishekë, fishekë luftarak, kapsolla detonatore, fitil zjarrrpërcjellës, 1 armë gjahu, 2 radio marrëse-dhënëse si ato të Policisë, 2 skafandra motori dhe 1 automjet, si dhe rreth 90 000 euro të përfituara nga aktiviteti kriminal.

Pritet që në zbatim të marrëveshjes së bashkëpunimit mes Interpol Tirana dhe homologëve spanjollë, të bëhet ekstradimi i Hektar Ndokës.

Kujtojmë se autoritetet spanjolle njoftuan më herët gjatë së enjtes se kishin arrestuar dy shqiptarë të cilët, sipas tyre, janë anëtarë të një organizate kriminale dhe që ishin larguar nga Shqipëria pasi tentuan të vrisnin anëtarë të një bande rivale.