Departamenti Amerikan i Drejtësisë zbuloi disa dokumente konfidenciale gjatë një kontrolli në shtëpinë e presidentit amerikan Joe Biden në qytetin Wilmington, në shtetin e Delaware, njoftoi avokati i presidentit, Bob Bauer.
Të premten, Presidenti Biden lejoi hyrjen në shtëpinë e tij për të “kërkuar të gjitha ambientet në kërkim të të dhënave të mundshme të zv. presidentëve dhe materialeve të mundshme konfidenciale”, sipas një deklarate nga avokati i Biden.
Gjatë kontrollit, i cili zgjati më shumë se 12 orë, u gjetën dokumente nga mandati i Bidenit në Senatin amerikan, në të cilin ai ishte anëtar për 36 vjet, ndërsa dokumente të tjera ishin të periudhës kur ai ishte nënkryetar i SHBA-së.
Avokati deklaroi se as Biden dhe as gruaja e tij nuk ishin të pranishëm gjatë kontrollit.
Ndërkaq, Biden tha pak ditë më parë se “nuk i vjen keq” që në shtëpinë dhe ish-zyrën e tij janë gjetur dokumente konfidenciale dhe se beson se problemi do të zgjidhet.
“Nuk jam penduar. Mendoj se do të zbuloni se nuk ka asgjë atje. Ne jemi duke bashkëpunuar plotësisht dhe mezi presim ta zgjidhim këtë çështje shpejt,” u tha Biden gazetarëve të enjten gjatë turneut të dëmeve nga stuhia në Kaliforni.
Ai shtoi se dokumentet i janë dorëzuar Arkivit të Shtetit menjëherë pasi janë gjetur. Ekipi ligjor i Biden tha javën e kaluar se në nëntor zbuloi rreth 10 dosje në një kabinet të mbyllur në Qendrën Penn Biden në Uashington.
Dy ditë më vonë, më 12 janar, Shtëpia e Bardhë njoftoi se një grup i dytë dokumentesh të klasifikuara nga koha e tij si zv. president në administratën e Barack Obamës ishte gjetur në shtëpinë e Biden.
