Poeti, historiani dhe kritiku i kulturës, Kelly Grovier ka përzgjedhur 14 nga fotot më befasuese të këtij viti, duke përfshirë ushtarët ukrainas që luajnë shah me kokteje molotov, protestuesit iranianë dhe zjarret në Spanjë dhe SHBA, dhe i krahason ato me vepra arti ikonike. Janë fotot që kanë shenjuar historinë e vitit 2022.
Një burrë ulet në një karrige plazhi duke mbajtur një çadër për t’u mbrojtur nga dielli përvëlues, në mes të tymit nga dy goma që digjen në dy anët e rrugës, ndërsa ai është ulur në mes të autostradës. Qëllimi tij është pengimi i hyrjes në Iquique, një qytet në Kilin verior pranë kufirit me Bolivinë, ku disa grupe protestonin kundër imigracionit të paligjshëm.
Kur Mahsa Amini, një grua 22-vjeçare iraniane, vdiq në një spital të Teheranit në rrethana të dyshimta më 16 shtator, gratë në mbarë botën filluan të prisnin flokët në shenjë proteste kundër trajtimit dhe vrasjes të saj nga qeveria e Iranit. Fotot e Nasibe Samsaei, një gruaje iraniane që jeton në Turqi, duke prerë bishtin e saj si një shfaqje solidariteti dhe kundërshtimi jashtë konsullatës iraniane në Stamboll, u bënë virale.
Në korrik 2022, NASA publikoi një foto befasuese të hapësirës, ku duket Mjegullnaja Carina. I kapur nga teleskopi i ri hapësinor James Webb fotoja i ngjan valëve të maleve dhe luginave.
Për gati tre javë nga fundi i korrikut, në qarkun Mariposa të Kalifornisë, zjarri shkatërroi pothuajse 200 ndërtesa. Fotoja tregon brendësinë e një shtëpie që po digjet.
Dy javë pasi forcat ruse pushtuan Ukrainën, fotografitë e një loje shahu të luajtur nga anëtarët e njësisë së Mbrojtjes Territoriale, të ngarkuar me ruajtjen e një zone në periferi të Kievit lindor pas shtetrrethimit, u bënë virale. Pjesët nuk ishin krijuar nga druri, fildishi, rrëshira ose plastika siç është tipike, por kokteje molotov vdekjeprurëse.
Në nëntor 2022, protestuesit që mbanin fletë të zbrazëta para fytyrave të tyre dolën në rrugët dhe sheshet e shumë qyteteve kineze për të protestuar kundër kufizimeve të palëkundura të vendit për Covid. Ato u nxitën nga një zjarr në një apartament në provincën Xinjiang i cili shkaktoi vdekje për të cilat shumë këmbëngulën se mund të ishin shmangur nëse nuk do të ishin zbatuar politika të tilla strikte.
Një foto e tre murgjve të rinj, të veshur me rroba tradicionale ngjyrë të kuqe, duke fshirë një trotuar përgjatë një rruge jashtë manastirit budist në Godavari, në jug-lindje të Katmandu.
Nën “mbulesën” e natës dhe të ndriçuar vetëm nga shkëlqimi i një pishtari, një grup migrantësh azilkërkues nga Amerika Qendrore nisin një udhëtim të rrezikshëm drejt SHBA-së në qershor.
Në korrik 2022, dy mbështetës të grupit aktivist mjedisor Just Stop Oil, i cili kërkon që qeveria e Mbretërisë së Bashkuar të ndalojë licencimin dhe prodhimin e karburanteve fosile, “morën peng” peizazhin e famshëm të artistit romantik John Constable, “The Hay Wain”.
Në tetor 2022, biznesmeni miliarder Elon Musk ndau një video të tij duke futur një lavaman kuzhine në selinë e platformës së mediave sociale Twitter, të cilën ai sapo e kishte blerë. Musk i ka bashkangjitur videos mbishkrimin “lëre që të zhytet”.
Vendimi i marrë nga Gjykata e Lartë e SHBA në verën e vitit 2022 për të rrëzuar një vendim të mëparshëm që ishte marrë në vitin 1972, kur garantonte të drejtën e një gruaje për një abort, u prit me protesta nga mbështetësit pro-zgjedhjes. Fotoja e aktivistes, Sam Scarcello, e cila u mbulua me lëndë që dukej si gjak jashtë gjykatës në Ditën e Pavarësisë, u bë virale.
Fotografitë që dokumentonin pikëllimin që pasoi vdekjen e Mbretëreshës Elizabeth më 8 shtator, ishin po aq të paharrueshme sa ky imazh i Princit George, duke parë makinën shtetërore që mbante stërgjyshen e tij.
Një foto e zjarrfikësve spanjollë që po luftojnë me flakët në fshatin A Cañiza, Pontevedra, duket se ka marrë jetë nga faqet e një dorëshkrimi mesjetar. Në foto duket sikur zjarri ka marrë formën e një dragoi që vjell zjarr. Ky ka qenë viti më i keq për zjarret në Spanjë në tri dekada.
Një foto e sulmuesit argjentinas Lionel Messi, ndërsa qëndron mbi supet e shokëve të tij teksa festojnë fitoren në ndeshjen finale të Kupës së Botës kundër Francës u bë virale në të gjithë botën.
