Britania e Madhe do të dërgojë 20 000 trupa në një nga manovrat më të mëdha ushtarake të NATO-s që nga Lufta e Ftohtë, pasi aleanca po praktikon zmbrapsjen e një pushtimi nga forcat e presidentit rus, Vladimir Putin.
Ministri i Mbrojtjes, Grant Shapps do të njoftojë vendosjen e anëtarëve të ushtrisë, Marinës dhe RAF në manovrën e 31 vendeve në të gjithë Evropën, gjatë një fjalimi sot në Londër.
Manovrat ushtarake vijnë pasi ministrat njoftuan një paketë të re mbështetjeje prej 2,5 miliardë paund (3,2 miliardë dollarë) për Ukrainën dhe sulmet ajrore të RAF, Forcat Ajrore të Britanisë së Madhe.
Shapps do të paraqesë vizionin e tij për mënyrën se si Britania e Madhe do të pengojë kërcënimet, pasi aleatët mbeten të shqetësuar për kërcënimin e paraqitur nga Putini ndërsa lufta e tij po i afrohet vitit të dytë.
Rreth 16 000 trupa me tanke, artileri dhe helikopterë do të vendosen nga Ushtria Britanike në të gjithë Evropën Lindore duke filluar nga muaji i ardhshëm si pjesë e manovrave.
Marina Mbretërore do të vendosë më shumë se 2000 marinarë në tetë anije luftarake dhe nëndetëse, ndërsa më shumë se 400 komando të marinës mbretërore do të dërgohen në Rrethin Arktik.
RAF do të përdorë aeroplanët sulmues ”F-35B Lightning” dhe aeroplanët e vëzhgimit ”Poseidon P-8”.
