Mediat italiane kanë zbuluar detaje të reja nga operacioni “Samba 2020” që çoi në sekuestrimin e 333 kg kokainë në portin e La Spezia. Lënda narkotike vinte nga Brazili dhe konsiderohet si një nga më të mëdha të kapura ndonjëherë në zonë. Ajo ishte e ndarë në 300 pako e fshehur brenda një kontejneri, i cili mbante arka me pllaka graniti.
Vlera e kokainës është rreth 100 milionë euro. Kontejneri u zbulua pas një kontrolli rutinë në bazë të analizës së riskut për shkak të origjinës së tij. Kontejneri u vendos në skaner ku edhe u vu re diçka e pazakontë. Agjentët e doganës dhe GDF vendosën ta hapnin dhe aty gjetën lëndën narkotike. Gjithësi autoritetet italiane nuk u nxituan.
Ata e lejuan kontejnerin të dilte nga porti dhe u vunë në ndjekje të tij. Sapo ai u fut në një magazinë në Massa Carrara aty ndërhynë forcat e policisë. Në pranga u vunë 4 persona nga të cilët një shqiptar me iniciale B.A., një italian, një kroat dhe një brazilian. Sipas mediave italiane droga ishte porositur në Brazil nga Ndragheta dhe mafia shqiptare.
