Koronavirusi vijon të shënojë jetë të humbura duke e çuar në 43 totalin e viktimave të kësaj pandemie në vendin tonë.
“Në 24 orët e fundit një 70 vjeçare nga Durrësi ka ndërruar jetë në spitalin infektiv, me gjithë mjekimin intensiv dhe përkujdesen e mjekëve. 70 vjeçarja e prekur nga Covid19, vuante nga një formë e rëndë e leukozës”, deklaroi ministria e Shëndetësisë.
Hyn në hartë Përmeti
Në 24 orët e fundit rastet e reja me koronavirus janë shtrirë në disa qytetet. Për herë të parë raste janë shënuar edhe në Përmet.
“Janë konfirmuar 53 raste pozitive, kryesisht raste të reja si dhe kontakte të rasteve të konfirmuara më herët pozitive. 26 të prekur në Tiranë, 6 në Shkodër, 5 në Krujë, 4 në Vlorë, nga 3 raste në Fier dhe Pogradec, nga 2 raste në Kukës dhe Lezhë, nga 1 rast në Durrës dhe Përmet”.
Edhe moshat e reja në spitalin infektiv
Problematike mbetet situata në shërbimin infektiv, ku janë shtruar edhe mosha të reja.
“Vijon të ketë shtrime të reja te qytetarëve që kanë nevojë për trajtim spitalor, duke përfshirë dhe moshat e reja 30-40 vjeç. Aktualisht në shërbimin infektiv po marrin shërbim 63 pacientë, 7 prej tyre janë në terapi intensive ndërsa 2 janë të intubuar”.
Me rritjen e rasteve të reja në rritje ka ardhur dhe numri i personave aktiv që rrezikojnë të përhapin infeksionin nëse nuk izolohen. Aktualisht janë aktualisht 722 të sëmurë me Covid-19, kryesisht në Tiranë, Shkodër, Durrës.
