Që prej verës së 2018-ës kur iu bashkua Juventusit, Cristiano Ronaldo u shndërrua në një lider të bardhezinjve, duke shënuar shumë gola, por goditjet e dënimit i ishin kthyer në një makth, pasi nuk po arrinte t’i dërgonte më në rrjetë.
Plot 43 tentativa në thuajse dy sezone, kanë shkuar dëm nga portugezi, i cili e kishte kthyer në një sfidë shënimin e golit nga goditja e dënimit, diçka që e bënte shpesh kur vishte fanellën e Realit të Madridit, por nuk po ia dilte me atë bardhezi mbi shpinë.
Megjithatë “mallkimi” u thye pasditen e sotme në derbin ndaj Torinos, kur CR7 ekzekutoi në mënyrë perfekte një goditje dënimi mbi vijën e 16 metrave dhe dërgoi sferën në rrjetën e portës së Sirigut, ku ky i fundit ndonëse e preku topin, nuk arriti t’i ndërrojë udhë.
Herën e fundit që Ronaldo kishte shënuar nga goditja e dënimit, ishte më 16 dhjetor të 2017-ës, në një sfidë të vlefshme për Botërorin e Klubeve, mes Realit të Madridit dhe Gremios, ndërsa pas ndeshjes portugezi nuk e fshehu kënaqësinë që “u zhbllokua”.
“Kisha nevojë për një gol nga goditja e dënimit, për të rritur më shumë besimin. Më mungonte vërtetë shumë një gol i tillë. Zhvilluam një ndeshje mjaft të mirë dhe morëm një tjetër fitore në rrugën tonë drejt titullit kampion”, deklaroi portugezi pas ndeshjes.
