“Lautaro nuk bën punë, duhet kthyer Neymar. Nëse Neymar bashkohet me Messin, Barcelona do të jetë përsëri skuadra sensacionale që fitoi kaq shumë vite më parë”
Rivaldo, legjenda e Barcelonës dhe ambasador i “Betfair”, nuk beson se problemi i katalanasve është çështja e arbitrimit, siç denoncohet nga presidenti Josep María Bartomeu, por performanca e ulët e skuadrës: “Sipas mendimit tim, problemi i Barcelonës nuk është VAR-i apo vendimet e arbitrave. Problemi thelbësor është cilësia e ulët e futbollit të saj. Skuadra duhet të përmirësohet, të rikthehet në stilin e vet të lojës, t’i bëjë të gjithë të dashurohen sërish me të”.
Deklaratat e Bartomeut, një justifikim
Fituesi i “Topit të Artë” në vitin 1999 është i qartë se deklaratat e Bartomeu janë thjesht një justifikim: “Është normale që ndonjëherë të mërziteni nga vendimet e VAR-it, por gjithmonë kam thënë që nuk mendoj se arbitrat veprojnë me paramendim në favor të Real Madridit apo Barcelonës. Deklaratat e Bartomeu kanë objektiva të ndryshëm, por në thelb ai synonte të largonte vëmendjen e mediave nga momenti i trazuar që po kalon skuadra. Edhe pse katalanasit janë duke luftuar për La Liga-n, është e qartë se po kalojnë një moment të keq. Kësisoji, nëse drejtuesit tregojnë gjëra të tilla si VAR-i për të justifikuar veten para shtypit dhe tifozëve, thjesht largojnë përgjegjësitë nga vetja, nga lojtarët dhe trajneri”.
Në mjedisin e Barçës janë të bindur se Real Madridi është favorizuar në disa raste nga VAR-i, por Rivaldo e kundërshton me forcë këtë ide: “Barcelona ishte kryesuese e La Liga-s para ndalesës së pandemisë, tani qëndron pas Real Madridit. Ata nuk mund të thonë që VAR-i është përgjegjës për të gjitha këto, veçanërisht kur shihni se si luan Barcelona. Derbi kundër Espanyol më ka shqetësuar, sepse të gjithë prisnim diçka shumë më mirë, veçanërisht pas ndeshjes së shkëlqyer kundër Villarreal. Skuadra më la të shqetësuar, por për fat të mirë ndeshja u fitua dhe të paktën distanca prej 4 pikësh nga Real Madridi nuk u thellua”.
“Lautaro nuk bën punë, duhet kthyer Neymar”
Rivaldo, i cili gjithmonë ka sponsorizuar rikthimin e Neymar përpara blerjes së Lautaro Martinez, beson se tani është koha që Barcelona të përqendrohet vetëm te bashkatdhetari i tij në merkato: “Klauzola e Lautaro tashmë ka skaduar dhe Barcelona do të duhej të negocionte me Interin. Pa dyshim, besoj se tani duhet të përqendrohet vetëm te Neymar. Dhe ta bëjë që këtë verë. Nëse Neymar bashkohet me Messin, Barcelona do të jetë përsëri skuadra sensacionale që fitoi kaq shumë vite më parë. Neymar është nënshkrimi më i mirë për grupin, për t’i dhënë alternativa trajnerit në planin taktik, madje edhe për t’i mundësuar ndonjë pushim të nevojshëm Messit”.
