Pas kryetarit të Bashkisë së Tiranës, Erion Veliaj, edhe deputeti Ralf Gjoni ka konfirmuar se ka rezultuar pozitiv me koronavirus.
Në një postim në Facebook, deputeti shkruan se pas një gjendje gripale dhe tre ditëve me temperaturë, ka bërë tamponin dhe të hënën ka marrë përgjigje se ka rezultuar pozitiv.
Gjoni shkruan se tashmë se sot është në gjendje më të mirë shëndetësore, ndërsa thekson se do të qëndrojë në izolim për dy javët e ardhshme.
Postimi i Ralf Gjoni në Facebook
Mirëmëngjesi miq. Dje kam rezultuar pozitiv me Covid-19 pas tre ditësh temperature të lehtë e gjendjeje gripale. Sot jam më mirë dhe me sa kuptoj, drejt rikuperimit.
Mirënjohje të thellë për gjithë mjekët e komunitetin mjekësor që po përballet çdo ditë me këtë ‘armik’ të panjohur më parë.
Gjatë dy javëve të ardhshme do qëndroj në izolim total në shtëpi për të mbrojtur të tjerët.
Me sa duket praninë fizike në javën më kyçe të angazhimit tim parlamentar, atë të hapjes së listave, do ma mohojë një virus i padukshëm.
Sidoqoftë, mbetem më i përkushtuar se kurrë në distancë dhe ne kontakt të vazhdueshëm.
Kam kuptuar nga bisedat me mjekë e kolegë që gjatë dy javëve të shkuara, virusi është përhapur me shpejtësi të frikshme pa u ndjerë fare.
Kjo përhapje ka ndodhur në ambiente publike, dhe patjetër edhe në institucione shtetërore, përfshirë parlamentin.
Njerëzit po tregohen të pakujdesshëm dhe po refuzojnë të kuptojnë se Covid19 do disa ditë që të inkubohet në trup.
Në momentin që jep shenjat e para, ju mund të keni qenë i infektuar prej ditësh dhe ndërkohë mund t’ia keni kaluar virusin familjarëve e miqve të afërt.
NDAJ KUJDES MAKSIMAL!
Mos dilni në ambiente publike pa maskë.
Lani duart pa pushim.
Nëse keni shenjën më të vogël si temperaturë e lehtë, dhimbje koke, gërricje fyti, ethe, djersitje natën, dhimbje trupi, kollë, bllokim hundësh, humbje e nuhatjes/shijes apo çdo shenjë tjetër gripale, duhet të karantinoheni e të kërkoni kryerjen e tamponit.
Mos e neglizhoni miq. Disa do e kalojnë lehtë, e disa të tjerë do rrezikojnë jetën.
Përgjegjshmëria e secilit prej nesh gjatë 2-3 javëve të ardhshme duhet të jetë në nivelet maksimale.
