Italia ndihmon Shqipërinë në këto momente të vështira të përballjes me Covid19, me një ekip prej 6 mjekësh dhe infermierësh që do të japin asistencën e tyre në vendin tonë. Ministrja e Shëndetësisë dhe Mbrojtjes Sociale, Ogerta Manastirliu, së bashku me ambasadorin e Italisë në vendin tonë, Fabrizio Bucci kanë pritur në Aeroportin “Nënë Tereza” delegacionin Italian, i cili do të ofrojë eksperiencën e vyer për vendin tonë.
“Kur disa muaj më parë ju gjendëm pranë Italisë mike në një moment tejet të vështirë, nuk e kishim menduar se do të na e kthenit ndihmën kaq shpejt. Ishte një gjest solidar që erdhi natyrshëm dhe jam shumë e kënaqur që sot na gjendeni pranë në një moment të vështirë për ne, ku eksperienca që ju keni fituar do të jetë mjaft e vlefshme për ne dhe për sistemin tonë shëndetësor. Kjo pandemi na ka mësuar se lufta nuk fitohet i vetëm, por vetëm me solidaritet mes vendeve”, u shpreh Manastirliu.
Ambasadori i Italisë në Shqipëri deklaroi se ky është një gjest për një vend mik, i cili u gjend pranë Italisë në një moment shumë të vështirë.
“Qeveria italiane është shumë e lumtur që po ndihmon Shqipërinë, pas gjestit të madh që bëri Shqipëria për Italinë në muajin mars. Edhe Italia nuk i harron miqtë në nevojë”, tha ambasadori italian.
Ndërsa kryeministri Edi Rama në një postim në rrjetet sociale, ndërsa falënderoi në gjuhën italiane, thotë se Italia dhe Shqipëria do të jenë gjithnjë bashkë.
“Grazie Italia 🇮🇹❤️🇦🇱
Faleminderit ekipit të Mbrojtjes Civile Italiane, që zbritën në Shqipëri për të na ndihmuar me eksperiencën e tyre të paçmueshme në vijën e zjarrit kundër Covid19. Si përherë #Bashkë🇦🇱🇮🇹#Insieme come sempre”, shkruan Rama.
Task Forca e Emergjencave Civile italiane e përbërë nga shtatë ekspertë do të zhvillojë një veprimtari dypalëshe për një periudhë 14-ditore. Grupi i ekspertëve do të zhvillojë veprimtari konsulence dhe do të ndihmojë me qëllim formimin e veçantë të homologëve shqiptarë për çështje që kanë të bëjnë me aspektin shëndetësor specifik në diagnostikimin dhe luftën ndaj Covid. Grupi përbëhet nga një mjek urgjence, një anestezist dhe nga një funksionar i Emergjencave Civile të Qarkut të Puglia-s, nga një mjek dhe një infermier urgjence i Qarkut të Lombardisë, një mjek infeksionist i Qarkut të Lazio-s dhe nga një infermiere urgjence e Qarkut të Piemontes, e cila është nga Shqipëria. Krahas grupit të mjekëve dhe të infermierëve në Aeroportin e Rinasit ka mbërritur edhe një sasi prej 500.000 maskash kirurgjikale në ndihmë të vendit tonë.
