Partia Demokratike, përmes sekretarit të saj, Gazment Bardhi ka paditur në SPAK, ministrin e Brendshëm Sandër Lleshaj dhe drejtorin e Gjendjes Civile, Bledar Doracaj se po manipulojnë regjistrin e gjendjes civile me qëllim për të manipuluar listën e votuesve për zgjedhjet e 25 prillit.
Në padinë PD, i kërkon Prokurorisë së Posaçme Antikorrupsion të sekuestrojë dhe kontrollojë Regjistrin Kombëtar të Gjendjes Civile për të parë ndryshimin e vendbanimeve të qytetarëve, pa kërkesën e tyre, me qëllim për t’i penguar këta të fundit të votojnë.
“Çështja e ndryshimit të vendbanimit të qytetarëve, pa kërkesën e tyre me qëllim manipulimin e listave të votuesve duhet të hetohet nga SPAK. Partia Demokratike bën përgjegjës direkt Ministrin e Brendshëm Sandër Lleshaj dhe Drejtorin e Përgjithshëm të Gjendjes Civile Bledar Doracaj, për të cilët dorëzoi kallëzim penal në SPAK për 3 vepra penale: falsifikim i dokumenteve, shpërdorim i detyrës dhe shkelje e të drejtës së zgjedhjes. Prokurorisë së Posaçme Antikorrupsion i kërkohet të sekuestrojë të dhënat kompjuterike, siç është Regjistri Kombëtar i Gjendjes Civile për të vërtetuar ndërhyrjet e paligjshme në sistem me qëllim ndryshimin e adresës së vendbanimit dhe, për rrjedhojë, të pengojë qytetarët të votojnë, përmes ndryshimit të vendvotimit”, thuhet në njoftimin e PD.
Sipas sekretarit të Partisë Demokratike organet ligjzbatuese duhet të veprojnë pa asnjë hezitim dhe me profesionalizëm, duke qenë se jemi përpara akteve të rrezikshme që do të cënonin transparencën e procesit zgjedhor dhe lirinë e zgjedhjeve, si parime bazë të demokracisë.
