Ruajtja e dokumentacionit të Drejtorisë së Përgjithshme të Shërbimeve të Transportit Rrugor, ka qenë një shqetësim i madh, i cili ka ardhur duke u rënduar vit pas viti, paralelisht më shtimin e numrit të dosjeve dhe materialeve të tjera shkresore që duheshin trajtuar në arkivën përkatëse. E gjitha kjo situatë ka ardhur për shkak të volumit të madh të dosjeve që trajtohen nga ky institucion si dhe mënyrës së vjetëruar, sipas të cilës ato mbaheshin, por edhe amortizimit pothuajse të plotë të godinës ekzistuese të Arkivës së DPSHTRR.
Godina ku ndodhej Arkivi Qendror ishte e tejmbushur, ndërsa kishte shfaqur edhe probleme të shumta infrastukturore, duke vënë në rrezik ruajtjen e dokumenteve. Por ky shqetësim, i mbartur në vite, tashmë ka marrë rrugën e zgjidhjes. DPSHTRR, me fondet e veta ka nisur ndërtimin e godinës së re, ku do të vendoset Arkivi Qendror.
Ministrja e Infrastrukturës dhe Energjisë, Belinda Balluku e shoqëruar nga drejtori i DPSHTRR, Blendi Gonxhja si dhe deputetja e Durrësit, Milva Ikonomi, ndoqi nga afër fillimin e punimeve.
“Po punohet me cilësi. Ndërtohen 3 kate arkivë e re me të gjitha kushtet e duhura të mbrojtjes teknologjike dhe informatike. Pasi të përfundojë objekti, do kalojmë këtu projektin tonë të dixhitalizimit të arkivave, që ka filluar në Tiranë me regjistrat dhe indeksimin e të dhënave. Këto të dhëna po skanohen po lexohen nga sistemet dhe do jenë pjesë e një komunikimi që do të bëhet online, në mënyrë që jo gjithçka të lëvizet me dosje nëpër duar”, bëri të ditur Drejtori i DPSHTRR, Blendi Gonxhja.
Ministrja Balluku nënvizoi se ruajtja e dokumentacionit dhe arkivave është një detyrim ligjor, për të cilin ka kërkuar vëmendje maksimale nga institucionet e varësisë së MIE, qysh në marrjen e detyrës prej saj në fillim të vitit 2019. Këto arkiva kanë një ndikim të drejtpërdrejtë në rritjen e cilësisë së shërbimit ndaj qytetarit dhe në këtë drejtim ka një transformim rrënjësor krahasuar me pak vite më parë.
Ministrja Balluku theksoi se ka ndryshuar mentaliteti përsa i përket ofrimit të shërbimeve, mënyra sesi testohen qytetarët për të marrë patentën, mënyra sesi aplikohet online, gjithçka që ndodhte në tre javë të gjata, dhe ku nuk mungonin tendencat korruptive, tashmë kryhet për vetëm 2 ditë dhe madje në disa raste edhe më shpejt.
“Ne duhet të rrisim cilësinë e shërbimit. Qytetarët vijnë në sportelet e drejtorive të transportit, ata kalojnë kohë shpesh herë këtu, pavarësisht se Drejtoria e Përgjithshme e Shërbimeve të Transportit Rrugor është avangardë dhe ka vënë në jetë e para shërbimet tona online. Ne kemi një ndryshim të madh në ofrimin e shërbimeve. Shumica e tyre mund të merren online, por një pjesë e tyre kërkojnë që qytetari të jetë fizikisht prezent”, u shpreh Balluku.
Drejtoria Rajonale e Shërbimeve të Transportit Rrugor Durrës, është e dyta në rang vendi sa i takon numrit të shërbimeve që kryhen gjatë vitit, ku fluksi i lartë i qytetarëve që paraqiten pranë sporteleve kërkon, që edhe cilësia e shërbimit të jetë në nivele sa më optimale.
“Ne nuk merremi me fasada. Ne merremi thellësisht me procese. Ne jemi aty për të ndryshuar mentalitetin sesi duhet të ofrohet një shërbim dhe padyshim kjo bëhet në bashkëpunim me qytetarin. Tek të gjitha sondazhet që ne kemi bërë përsa i përket Drejtorisë së Transportit, kënaqësia e qytetarit është padyshim në përmirësim dhe kjo nuk bëhet thjesht duke ofruar shërbime përmes operatorëve, por edhe duke ndërhyrë në ambientet, në të cilat ky shërbim ofrohet”, shtoi ministrja e Infrastrukturës dhe Energjisë.
Ndërkohë, në Drejtorinë Rajonale të Shërbimeve të Transportit Rrugor Durrës po punohet për rikonstruksionin e fasadës dhe unifikimin e saj si dhe për disa mjedise të brendshme të godinës.
Drejtori i DRSHTRR Durrës, Kreshnik Tërnova e informoi ministren se për të qenë më pranë qytetarëve, kjo drejtori rajonale ka hapur edhe dy zyra në qytetet e Krujës dhe Kavajës, të cilat kanë një numër prej rreth 10 mijë automjetesh secila, në mënyrë që qytetarët e këtyre zonave të mund të aksesojnë shërbimet pranë tyre, pa qenë nevoja të paraqiten pranë drejtorisë së Durrësit.
