Ministrja e Arsimit, Evis Kushi në një komunikim për mediat shpjegoi se si do të zhvillohet mësimi pas 1 dhjetorit pas kërkesës së Ministrisë së Shëndetësisë që mësimi të bëhet i alternuar në shkollë dhe online. Kushi tha se mësimi i alternuar do të zhvillohet në mënyrë fleksibël nga shkollat.
Ajo bëri me dije se sipas udhëzuesit të hartuar nga Ministria e Arsimit, klasat e para tek të pestat dhe maturantët do të zhvillojnë mësim me prani fizike në klasa.
“Klasat e arsimit fillor, nga e para në të pestën, dhe klasa e 12-të (pra maturantët) do të zhvillojnë normalisht procesin mësimor në mjediset fizike të shkollës, njësoj siç kanë vepruar deri më tani me SKENARIN 1 të Udhëzuesit për fillimin e vitit shkollor 2020–2021.
Ndërsa klasat nga e 6 në të 9, si dhe klasat 10 dhe 11 do të zhvillojnë mësimin në këtë mënyrë:
Në javën tek, pra javën e parë dhe të tretë të muajit: 2 ditët e para të javës në mjediset e shkollës, dhe 3 ditët e tjera të javës online.
Në javën çift, pra në javën e dytë dhe të katërt, ditët këmbehen: pra 2 ditët e para të javës nxënësit janë online dhe 3 ditët e tjera të javës me prezencë fizike në shkollë.
Në varësi të situatës së krijuar nga pandemia COVID-19, në rast se shkollat kanë situata të rënduara në stafet mësimore apo tek nxënësit, me urdhër të MASR, mund të aplikohet skenari kur vetëm klasat fillore (nga 1 tek e 5) dhe maturantët zhvillojnë mësimin në klasë. Ndërsa klasat e tjera bëhen online.
Dhe në raste më të rënduara, vetëm klasa 1 dhe klasa 12-të në mjediset fizike të shkollës, ndërsa të gjitha klasat e tjera do të zhvillojnë mësimin online”, bëri me dije ministrja.
Një ditë më parë ministrja e Shëndetësisë, Ogerta Manastirliu i kërkoi Ministrisë së Arsimit që nisur nga 1 dhjetori të kalonte në skenarin dy, ose thënë ndryshe në mësim të alternuar në klasë dhe online.
